As Xornadas Política2.cero converten Compostela nun macroforo de debate da nova comunicación

As Xornadas Politica2.cero, dirixidas a expoñer en detalle o potencial das redes e as ferramentas sociais na vida función pública, inauguráronse hoxe xoves 14 en Santiago contando coa presenza dunha boa parte dos máis prestixiosos especialistas estatais en materia de comunicación ligada á innovación, e viceversa. O encontro, que conta co apoio do Concello de Compostela (co seu alcalde, Xerardo Conde Roa, oficiando a apertura das actividades), comezou coa intervención de Cristina Cifuentes, encargada de abrir a quenda de relatorios a través dun percorrido polo cambio da propaganda á comunicación política. O evento, que se celebra no Mosteiro de San Martiño Pinario, irá acollendo ao longo das dúas xornadas en que se desenvolve (hoxe e mañá xoves) a un bo número de especialistas en consultoría política e promoción en Internet a través das canles 2.0.
Segundo apunta a organización, trataranse en detalle cuestións específicas como as posibilidades destas ferramentas para acadar a máxima repercusión dunha campaña electoral ou a capacidade que temos como cidadáns de participar dixitalmente na vida pública.
Por certo que abano de relatores que incorpora o programa recentemente completado é especialmente amplo: amais de especialistas nestes eidos temáticos como Esther Checa, Antoni Gutiérrez, Carlos Gutiérrez ou Ricardo Maturama, tamén haberá representantes políticos con experiencia ampla nas redes sociais, como o alcalde de Jun, Antonio Rodríguez, ou mesmo a vicepresidenta da Asemblea de Madrid, Cristina Cifuentes.
Asemade, o evento compostelán dará acubillo, entre outras moitas cousas, a unha mesa redonda onde se afondará polo miúdo na potencialidade das canles 2.0 na promoción de produtos e servizos, unha mesa que contará coa presenza de Javier Piedrahita, Paz Pérez Pernas, Javier Recuenco, Nacho de Francisco e Alberto Seoane. Lembrar tamén a organización incluíu na súa axenda a prestixiosos representantes da estratexia política dixital en Hispanoamérica, como Javier Sánchez Galicia, Felipe Benítez ou Eduardo Congrains.