Balidea desenvolveu en Drupal 8 a nova web da Universidade de Vigo
xoves, 24 de maio do 2018
Os
días
pasados a Universidade de Vigo presentou a súa nova web, visíbel
no dominio uvigo.gal, unha nova e
dinámica ferramenta de comunicación na que todos os seus elementos
están dispostos para estreitar ligazóns coa comunidade
universitaria, as empresas da contorna, as entidades públicas e,
claro está, tamén coa cidadanía. Segundo
puidemos saber hoxe, a nova web foi desenvolvida en Drupal 8 pola
firma galega Balidea.
En
palabras dos responsábeis da empresa TIC, a páxina “é o
resultado dun proceso que arrancou en outono do ano pasado e que
xuntou a varios equipos baixo a imprescindíbel coordinación da área
TIC da universidade”. Nese proceso colectivo, Balidea encargouse do
desenvolvemento do portal, empregando Drupal 8 e poñendo en xogo
toda a súa experiencia previa nunha manchea de traballos semellantes
nos que se tirou proveito das anteriores versións de Drupal. No
labor despregado agora coa Universidade de Vigo trasladouse a web da
institución académica á última versión do que, en palabras de
Balidea, é moi probábel que sexa o CMS máis dinámico existente:
versátil, seguro e de código aberto.
Balidea,
entre as características do novo portal, salienta sobre todo a
reutilización de información grazas á conexión do portal coas
aplicacións de xestión coas que conta a Universidade de Vigo. O
obxectivo, ao fío do devandito, é “reducir o esforzo no manexo
interno dos datos e, ao mesmo tempo, garantir a súa axeitada
actualización”.
Como lembraremos, a nova web artéllase en cinco
grandes apartados: A Universidade (información da
institución), Estudar (oferta académica), Investigación
(actividade investigadora), No Campus (actividade
extraacadémica) e Vén a UVigo
(sobre o acceso á universidade). Conta ademais con catro accesos por
perfís de usuario: Estudantes, PAS, PDI e Empresas.
Segundo explica Balidea, a solución achegada “fixo posíbel
trasladar a proposta de deseño e de organización de contidos a un
portal web que responde axeitadamente á demanda dunha navegación
lóxica e un funcionamento 100% responsive”.