Balidea pon a súa experiencia ao servizo da nova web das Illas Atlánticas
martes, 1 de febreiro do 2022
A
páxina web sobre o Parque
Nacional das Illas Atlánticas da que falamos
en Código Cero con motivo do seu lanzamento foi desenvolvida
pola empresa tecnolóxica galega Balidea. Fíxoo empregando a
versión 9 do coñecido xestor de contidos Drupal, poñendo a súa
experiencia ao servizo dun sitio que quere ser de utilidade para os
visitantes á vez que divulgador dende o punto de vista
medioambiental.
A
páxina foi encargada e impulsada pola Axencia para a Modernización
Tecnolóxica de Galicia (AMTEGA) que dirixe Mar Pereira, en
colaboración co Parque Nacional das Illas Atlánticas, dependente da
Consellería de Medio Ambiente. O seu obxectivo é de constituír o
punto de referencia para toda a información oficial relacionada con
este espazo natural protexido.
A
web está dirixida principalmente a visitantes do parque en todas as
súas modalidades e segundo lembra a empresa compostelá Balidea
supón numerosas melloras con respecto á anterior a nivel
tecnolóxico, funcional, estrutural, conceptual e de deseño. Por
exemplo na súa feitura final fronte ao usuario, que presenta un gran
impacto, baseándose na técnica flat design para
dar prioridade aos compoñentes visuais.
Ademais,
Balidea salienta o seu deseño responsive, no que o tamaño e
disposición dos elementos adáptase ao tamaño da pantalla das
persoas usuarias, “supondo unha experiencia de usuario máis
satisfactoria”. Por outra banda, realizouse unha redistribución
dos contidos optimizando ao máximo a navegación, con catro grandes
seccións (O parque, Visita o parque, Actividades e participación
e Educaparque),
que abranguen contido informativo e práctico sobre as Illas
Atlánticas.
“Neste
novo portal”, explica a empresa TIC, “atoparemos todo o que é
necesario coñecer antes de visitar as illas: os requisitos a cumprir
para visitalas, as autorizacións e permisos necesarios, como
tramitalos, como solicitar visitas guiadas ou a normativa e
protocolos de aplicación, así como recomendacións básicas a ter
en conta”. Así mesmo, recolle toda a información sobre as
actividades organizadas polo parque, os cursos ou os programas de
voluntariado, e tamén recursos informativos e divulgativos, como
mapas de rutas e puntos de interese, folletos ou guías sobre os seus
valores naturais e materiais educativos para os máis pequenos.