Bertamiráns acolleu a presentación do portal web #galegoempresas

O consistorio de Ames (Bertamiráns) acolleu hoxe a presentación da plataforma galegoempresas.santiagodecompostela.gal, impulsada polos concellos de Ames, Santiago e Teo e destinada a mostrar e recoñecer a importancia de achegar produtos e servizos en galego, visualizando o importante labor das empresas locais que apostan nas súas comunicacións e promocións pola lingua de seu. Foi unha xornada aberta ao público en xeral e, por suposto, ás empresarias e empresarios interesados en coñecer esta ferramenta de difusión.
Participaron, por parte do Goberno de Ames, a concelleira de Normalización Lingüística, Isabel Vaquero, e a concelleira de Promoción Económica, Isabel González, amais do técnico da empresa Ágora Aberta, encargado da elaboración desta plataforma web, Óscar Maceira. Ao acto tamén acudiron os técnicos de Ames Rosa Moreiras, técnica de Normalización Lingüística, e Jorge Couñago, técnico de Promoción Económica.
En termos máis concretos, #galegoempresas ten como obxectivo facilitar á cidadanía o coñecemento e o acceso á oferta en galego no sector socioeconómico, ao tempo que recompensa a responsabilidade social das empresas ou negocios que usan a nosa lingua cunha maior difusión e visibilidade dos seus produtos ou servizos. Ademais, o servizo permite dispoñer de datos sobre o uso do galego de cara a mellorar as actuacións de dinamización lingüística que se realizan neste ámbito dende a administración local.
Durante a presentación, o técnico de Ágora Aberta Óscar Maceira, destacou que este directorio quere ser un ligazón entre as empresas que usan o galego, por unha banda, e os usuarios/as que solicitan este servizo, pola outra. Nas súas palabras, “xorde da necesidade de cubrir a demanda do público por negocios que os atendan na nosa lingua”. O técnico tamén puxo o foco nas facilidades que pon en xogo a plataforma, tanto para as empresas á hora de acceder e subir a súa información de maneira doada e rápida, como para o consumidor/a á hora de chegar a ela.
A concelleira de Normalización Lingüística e Comunicación, Isabel Vaquero, sinalou que con iniciativas como a posta en marcha deste directorio ou o Premio Lingua e Empresa, búscase “agradecer e recoñecer o traballo dos membros do sector socioeconómico que axudan a poñer en relevo o feito de que o noso idioma tamén é válido para o mundo dos negocios”. Asemade, salientou a importancia destas iniciativas, enfocadas a “intentar aumentar e mellorar o uso do galego neste sector”.
Pola súa banda, Isabel González, concelleira de Promoción Económica e Atención Veciñal, expresou o seu desexo de que #galegoempresas “sexa unha ferramenta que siga axudando ás empresas que xa veñen achegando os seus servizos e/ou produtos en galego”, así como de que “se incremente o número de empresas, tanto do noso concello como de Santiago e Teo, que se animen a formar parte desta plataforma ata convertela nunha rede máis grande e ampla”.
Sinxeleza e accesibilidade
O Concello salientou recentemente o carácter sinxelo da ferramenta, destacando que as empresas interesadas e incorporarse á plataforma poden facelo en poucos pasos, accedendo á mesma e cubrindo o formulario de autodiagnose. Unha vez que sexa validado polo servizo de normalización lingüística municipal, recibirán unha mensaxe para que completen a información coa que se queren presentar publicamente, como o logo, datos de contacto, descrición, imaxes, web, redes sociais. A partir dese momento, a súa ficha está dispoñible para o público xeral cos datos que as empresas queiran facer públicos para difundirse e cunha valoración da porcentaxe de uso do galego que ofrecen.
Logo, a nivel de usuarios de a pé, podemos realizar buscas por localización xeográfica e por sector, ou atopar o establecemento do noso interese de maneira directa para ter todos os seus datos de contacto á man.