Chega a 10ª edición do Carballo Interplay promovendo os contidos dixitais feitos en Galicia

Serán os días 29, 30, 31 de marzo e 1 de abril cando teña lugar a décima edición do Carballo Interplay, que desta volta quer render homenaxe a unha década de talento galego ao mesmo tempo que busca pór en valor os contidos dixitais dende Galicia e en galego, xa sexa en redes sociais coma Twitter, Youtube, Twitch ou Tiktok, no eido audiovisual ou en formato podcast.
Indo xa ao Carballo Inteplay, sinalar que os contidos galegos protagonizarán as xornadas do mércores 29 e o xoves 30 de marzo, que contarán con actividades coma a gravación en directo do podcast Petiscos no Derby, a estrea do espectáculo Dando a turra, o repaso á historia da internet galega con María Yáñez en O outro lado da pantalla, a exhibición de iniciativas que optarán ao premio de Mellor proxecto de serie web e a estrea en exclusiva do proxecto gañador na anterior edición.
O festival comezará o mércores 29 de marzo ás 11:00 co acto de apertura e a entrega de premios de Dinoescolas. O certame Dinosaurio Escolas ten como obxectivo a incentivación da creación de contidos audiovisuais orixinais en lingua galega para a súa difusión por internet mediante a creación de capítulos da serie Dinosaurio.
No acto de apertura do festival, ademais de contar con distintas personalidades e explicar brevemente a programación desta edición, proxectarase os Dinosaurios para que todo o mundo poida ver as súas creacións na gran pantalla e terá lugar a entrega de premios.
Ás 12:00 comezará Dando a turra, un talkshow creado por Belén Puime e Uxía Vázquez, con convidadas sorpresa. A intención deste programa é falar con distintas personalidades da mocidade galega sobre un futuro adulto que cada vez está máis preto, así como tentar dar resposta a preguntas do tipo: Como vai afrontar esta xeración ser adultos funcionais?; Que cambios debería haber no eido laboral?; É a Xeración Z unha xeración de cristal?
As creadoras son Belén Puime, creativa na produtora Unicorn Content, e Uxía Vázquez, creadora do podcast Falar sen saber, e definen este espectáculo como “unha charla que ben podería darse nun bar ou no baño dunha discoteca barata”.
No xoves 30 de marzo, levarase a cabo a presentación dos Dinosaurios, para dar a coñecer o proxecto ante un público formado por varios centros educativos galegos.
A continuación, ás 12:00, a creadora cultural María Yáñez proporá en directo, a través da súa experiencia persoal, unha viaxe dende os inicios da internet galega deica as portas da chegada das redes sociais. O outro lado da pantalla será un repaso a como chegaron as primeiras conexións nos anos 90, as primeiras webs en galego, os primeiros medios dixitais e as primeiras plataformas sociais de contido.
A última actividade da mañá é a emisión en directo de Petiscos no Derby, edición especial do podcast Café Derby 21, creado por Carme D. Prol, Adrián Lede e Nico Carreira. Esta creación sonora nace de conversas na cociña dun piso de estudantes e busca analizar a actualidade da cultura galega.
Nesta ocasión estarán acompañados de creadores de contido como as tiktokers Totakeki, Meryfos e Sara Seco, e as creadoras do programa Todo Mal, Carla Núñez e Marcos López (autor tamén do proxecto satírico Telejaita).
Esa mesma tarde, continúa o talento galego co pitching de proxectos de serie web en galego, a partir das 18:30. Os finalistas do certame presentarán os seus proxectos ante un xurado especializado que decidirá que proposta levará 3.000 euros para financiar a súa obra.
Logo, ás 20:00, terá lugar a estrea en exclusiva do proxecto que foi seleccionado o ano pasado, Mentres non chova, unha obra creada por Carla Mojón, Xiana Rei Martiz e Luiza Velizarova. A webserie trata unha realidade distópica na que un malvado empresario busca instalar unha cúpula xigantesca que protexa toda Galicia da chuvia, para así aumentar os seus beneficios económicos.
O talento galego non só estará sobre o escenario, este ano o Carballo Interplay decidiu colaborar directamente con A Cousa, un medio nativo dixital creado en 2021 por xente nova da Xeración Z que estará narrando o festival en directo. O seu equipo está formado por Isabel Gutiérrez, Xulia Lomba, Yaiza López e Aida Vilariño.