Chega ao seu remate o cableado con fibra óptica do centro histórico de Monforte de Lemos

Monforte de Lemos acadou nestes comezos de 2023 un histórico fito tecnolóxico: o cableado integral con fibra óptica do seu centro histórico. En concreto, 1.650 familias desta contorna urbana contan xa coa conexión de alto rendemento que proporciona por Adamo, con ata 1.000 Mb de velocidade.
A despregadura, recentemente concluída, foi executada para a dita empresa de telecomunicacións pola operadora galega neutra Rede Aberta, colaboradora de Adamo na zona. Grazas a este traballo conxunto, ademais de expandir un servizo clave, Adamo quixo “fomentar o crecemento económico en Monforte de Lemos, así como a contratación de profesionais e técnicos locais”.
Fibra óptica en 2.250 fogares monfortinos
A presenza da compañía non é nova no concello, posto que 600 vivendas situadas fóra do centro histórico tiñan previamente Internet ultrarrápida fornecida por Adamo. Así, son 2.250 inmóbeis de Monforte os que, en total, benefícianse da infraestrutura asentada pola empresa.
Espallamento no sur de Lugo
Este paso de xigante no concello enmárcase no ambicioso plan de expansión que Adamo está a desenvolver no sur da provincia. Para empezar, os 2.600 domicilios xa cableados na Ulloa, Chantada e Terra de Lemos. Para continuar, o crecemento seguirá nas tres comarcas: na primeira, en Antas de Ulla, Monterroso e Palas de Rei; na segundo, nos municipios de Chantada, Taboada e Carballedo; mentres que, na terceira, o operador engadirá Bóveda e A Pobra do Brollón. “Pero aínda haberá máis, dado que a comarca de Quiroga ampliará o cableado cara ao sueste de Lugo”, explicaron fontes de Adamo.
Adamo, en 70.000 fogares da provincia
Así mesmo, o operador acumula máis de 70.000 vivendas cableadas en 35 concellos lucenses desde mediados de 2018 ata o de agora. Para sufragar estes traballos, Adamo investiu 20 millóns de euros e contratou a 300 traballadores locais en enxeñería, despregadura, mantemento e comercialización.
Máis de 100.000 en dous anos
“Este crecemento non se detén”, explicou a compañía de telecomunicacións, lembrando que resultou adxudicataria da última convocatoria de axudas estatais e comunitarias para a instalación desta infraestrutura no territorio. En virtude do orzamento público-privado resultante do Programa Único, de 17,5 millóns, Adamo levará Internet ultrarrápido a 33.000 fogares rurais de Lugo entre 2023 e 2024 para sumar máis de 100.000 inmóbeis conectados á súa rede de alta velocidade no conxunto da provincia.