Cinfo impulsa a transformación dixital das instalacións deportivas municipais da Coruña
martes, 6 de xullo do 2021
O
Concello
da Coruña e a empresa local Cinfo, con sede no CITIC, formalizaron
un acordo para impulsar a transformación dixital das instalacións
deportivas municipais. Así o informaron a edil de Deportes,
Mónica Martínez, e máis Antonio Rodríguez del Corral, director
executivo (CEO) da dita empresa de sistemas intelixentes de
seguimento. O obxectivo é transmitir todos os partidos e
competicións do deporte base coruñés a través das máis avanzadas
ferramentas.
O
Concello porá en marcha despois do verán unha proba piloto en cinco
pavillóns da cidade: Os Rosales, Novo Mesoiro, San Francisco Javier,
Barrio das Flores e Sagrada Familia.
Como
lembraremos, Cinfo é responsábel do sistema de produción
automática Tiivii, unha tecnoloxía que nos permite acceder e
visualizar as actividades programadas nun espazo deportivo concreto
(neste caso as instalacións deportivas da Coruña) por medio dun
sistema de retransmisión en directo de forma totalmente automatizada
e sen necesidade de intervención humana. Recentemente, Cinfo
habilitou as súas tecnoloxías nas clases da Universidade da Coruña.
Precisamente
o sistema Tiivii está no alicerce do acordo formalizado co Concello
coruñés. Martinez explicou que esta tecnoloxía fará posíbel a
retransmisión automática de eventos deportivos a través dun
sistema de cámaras que utilizan a Intelixencia artificial mais unha
plataforma de contidos audiovisuais posta en marcha actualmente en
máis de 60 instalacións.
O
Concello ten previsto despregar o sistema durante este verán coa
finalidade de que estea dispoñíbel para a nova tempada deportiva
nos cinco devanditos pavillóns. Desta forma, explicou a concelleira,
“o Concello non só aposta por modernizar os polideportivos da
cidade, mais tamén por apoiar os clubs e ao deporte base coruñés
que, en diante, contarán cun sistema de emisión intelixente
accesíbel os 365 días do ano para transmitir todos os seus partidos
e competicións, facilitando que toda a cidadanía poida gozar deles
desde as súas casas ou desde o lugar que prefiran, escoitando o
mesmo ambiente que se estivesen no pavillón”.
Máis
datos sobre Tiivii
Tiivii,
a través do equipamento despregado e dunha mesa de produción na
nube, ten capacidade para facer o seguimento do xogo, engadir o
marcador do partido, publicidade e seleccionar entre as cámaras
habilitadas a que mellor ángulo do xogo proporcione para facer un
seguimento automático da competición. A través deste produto,
todos os eventos que se disputen nestes pavillóns poderán ser
retransmitidos en directo sen necesidade de que ningunha persoa teña
que desprazarse ás instalacións deportivas.