Compañías líderes en tecnoloxía mostrarán as principais tendencias TIC da man de R

Dende o vindeiro luns 13 e ata o venres 17 de febreiro, en formato dixital e interactivo, especialistas de empresas referentes do eido dixital ofrecerán a súa visión sobre as principais tendencias tecnolóxicas e os retos derivados da transformación das empresas no marco da II Semana das Tendencias TIC que organiza a operadora de orixe galega R.
As xornadas, divididas en cinco sesións de 30 minutos cada unha, estarán dirixidas cada día por un experto/a dalgunha das compañías tecnolóxicas punteiras no mundo convidadas ao evento; neste caso, Fortinet, Aruba, Microsoft, Red Hat e Commvault, que, por esta orde de luns a venres, debullarán as principais tendencias TIC que marcan os novos tempos. Amais, segundo explica R, ofrecerán “a súa visión estratéxica para axudar na toma de decisións e adiantarse aos desafíos máis importantes que será necesario afrontar no sector da TIC ao completo, nun futuro que xa está presente”.
As sesións serán de balde e accesibles mediante inscrición previa.
As sesións
A primeira sesión correrá a cargo de Cristian Bermejo, de Fortinent, que afondará nas claves para garantir a integración da seguridade da cloud co posto de traballo.
O martes 14 será a quenda de Aruba. Nesta xornada, Iratxe Macías analizará presente e futuro da tecnoloxía da conectividade na empresa e a axilidade necesaria para adoptar novas capacidades e procesos apoiados na tecnoloxía.
A terceira sesión correrá a cargo de Microsoft, coa intervención de Manuel García, que afondará na utilización de ferramentas que lles axuden ás empresas a protexerse das ciberameazas.
Red Hat, co experto Alberto Torres, afrontará a xornada do xoves para analizar a novo paradigma do desenvolvemento de aplicacións e como implantar a arquitectura de microservizos.
Por último, o venres 17, a II Semana das TIC concluirá coa quenda de Commvault, da man de Sandra Espinoza, que afondará na xestión do dato, un activo estratéxico clave nas compañías neste momento.
Cada unha das sesións finalizará cunha quenda de preguntas na que os participantes poderán conversar cos expertos e as expertas e expor dúbidas e cuestións xurdidas ao longo da intervención.