Coremain conta dende xa con novo director financeiro: Alberto Álvarez Cid

A firma Coremain, consultora TI emprazada no Polígono de Costa Vella de Santiago, ten novidades importantes no seu cadro de mando e na súa estratexia xeral, novidades que sumar a outras innovacións recentes como a renovación da súa páxina web, ou o nomeamento de Tito Barreiro como director de Desenvolvemento de Negocio Global. A todo isto cómpre engadir agora a incorporación de Alberto Álvarez Cid como director financeiro da compañía, un nomeamento que coincide no tempo cun proceso de seu que Coremain cualifica de “regreso ao camiño da rendibilidade”.
Precisamente, Álvarez Cid substitúe no seu posto a Javier Atán, que se incorpora, tal e como sinalamos hoxe en Código Cero, a outra firma santiaguesa do sector: Ednon.
Alberto Álvarez Cid, informa Coremain, “aglutina no seu perfil experiencia no mundo da consultoría, en reestruturación corporativa e refinanciamento”. Ademais, conta cunha ampla traxectoria internacional, “elementos todos eles de sumo interese no plan de desenvolvemento de Coremain”, que, por certo, vén de constituír unha empresa en México, co-participada por Valora Consultores e Academia Postal. A estes cambios únese tamén unha reestruturación interna que a empresa xestiona baixo “un elemento común”. Este elemento común é o propio proxecto de empresa, que quere centrarse máis ca nunca no cliente e suprimir niveis organizativos para “acadar unha compañía máis flexible que responda con rapidez aos cambios do mercado”.