Coremain renova até 2025 a certificación que confirma a excelencia da súa xestión de calidade

Coremain comezou o mes de marzo cun importante recoñecemento á súa excelencia tecnolóxica e operativa. Concretamente, renovou até 2025 a certificación ISO 9001, que garante que o Sistema de Xestión de Calidade de Coremain cumpre “cos máis altos e esixentes requisitos e procedementos desta norma, tras superar con éxito tanto as auditorías de seguimento como a definitiva de renovación, realizada o pasado mes de decembro”, segundo informou a empresa con sede principal no Polígono de Costa Vella de Santiago.
Fontes da empresa tecnolóxica engaden que “o alcance desta certificación afecta tanto aos nosos servizos de subministración, instalación, reparación e mantemento de equipos informáticos, como á xestión e implantación de proxectos de cableados estruturado e comunicacións”. Tamén á dirección de proxectos de consultoría e asistencia técnica, xestión de centros de atención ao usuario e prestación de servizos de soporte funcional e técnico, así como aos estudos de viabilidade, análise, deseño, construción e implantación de sistemas de información e xestión de proxectos informáticos.
A súa consecución acredita ademais o compromiso de Coremain coa excelencia na xestión e a mellora continua. “Tamén”, engaden, “a nosa capacidade para ofrecer servizos seguros e fiábeis, rexidos cos máis altos estándares de calidade, así como para introducir solucións e unha metodoloxía de traballo enfocada a mellorar a satisfacción dos nosos clientes, mediante a vixilancia de procesos críticos e a aplicación de medidas correctivas, cando identificamos elementos de mellora”.
Trátase dun novo logro que “conseguimos como equipo, que implica un importante esforzo e traballo de fondo, así como un proceso de constante de evolución que forma parte da nosa cultura empresarial”, conclúen.