DATAlife e Raiola impulsan un proxecto de dixitalización para mellorar o benestar das persoas maiores en residencias

xoves, 16 de marzo do 2023 S. P.

A directora do centro de Raiola Residencial en San Marcos e o seu equipo profesional

O hub galego DATAlife mobilizou un proxecto de dixitalización liderado por Raiola Residencial e subvencionado polo IGAPE (liña Industria 4.0) para mellorar o benestar e a calidade de vida das persoas maiores en residencias de Raiola. Trátase da iniciativa +MANS 4.0, baseada na tecnoloxía dos obxectivos conectados (Internet das Cousas, IoT) e financiada polo Fondo Europeo de Desenvolvemento Rexional no marco do programa FEDER Galician 2014-2020. O alicerce do proxecto, o seu cometido base, é recoller datos da actividade dos centros e propoñer melloras na xestión do traballo.
Raiola
Raiola SAPM S.L. é unha empresa de recente creación que xestiona aloxamentos para persoas maiores en Galicia, concretamente nos concellos de Santiago de Compostela, Sada e Oleiros, baixo un modelo de servizos orientado ao benestar dos residentes. Raiola aposta por unha xestión baseada na innovación e traballa a partir dun modelo centrado na persoa, con atención individualizada e de calidade que pretende mellorar o enfoque da residencia tradicional e a experiencia que viven os usuarios.
+MANS 4.0, participantes
O proxecto +MANS 4.0 consiste na implantación dun sistema de mellora para a atención de persoas mediante tecnoloxías conectadas. No proxecto, ademais de Raiola, participan as firmas Anta Norte S.L. e ANM Soluciones Tecnológicas S.L.
Anta Norte S.L., con sede no concello de Vedra, é unha firma de enxeñaría con clasificación Empresa Innovadora de Base Tecnolóxico (EIBT) que ten unha forte vocación pola I+D+i e desenvolve produtos propios e para terceiros. Céntrase nas necesidades marcadas pola RIS3, estratexia global para Galicia para mellora da competitividade, o medre económico e o emprego sustentábel e de calidade a través da innovación.
Pola súa banda, ANM Soluciones Tecnológicas S.L. é unha empresa de desenvolvemento e automatización de ferramentas software, con sede no concello da Coruña, céntrase de xeito específico no sector socio-sanitario e pertence ao grupo Servicio Móvil.
O miolo do proxecto
O sistema pretende dar solución a unha serie de cuestións propostas no día a día do sector socio-sanitario. Por unha banda, recolle e xestión dos datos obtidos neste tipo de centros para maiores. A ferramenta, que rexistrará a actividade dos traballadores e usuarios, está baseada en módulos vinculados a tarefas concretas que permitirán establecer un proceso de mellora continua e terá unha gran capacidade de adaptación aos cambios.
Por outra banda, contará cunha novidade no sistema “paciente-enfermeira”, que evita os sistemas tradicionais de pantalla/dispositivo no interior das habitacións dos residentes. “Isto”, explican dende DATAlife, “permitirá realizar transaccións a través de dispositivos móbiles fóra da sala, e que o persoal xestione as súas funcións no exterior da habitación da persoa usuaria”. A implantación e posta en marcha da ferramenta, que será a curto prazo, “redundará nun servizo de mellor calidade para os residentes”, sinalan fontes do hub galego.
O proxecto +MANS 4.0 pretende, entre os seus obxectivos, integrar os distintos elementos físicos e virtuais nunha única solución, favorecendo a interoperabilidade dos mesmos. Esta innovadora ferramenta poderase trasladar e adaptar a outro tipo de residencias moi diferentes entre si.
Os proxectos financiados con estas liñas de axuda do IGAPE, en liña coa estratexia de Hubs de Innovación Dixital da Xunta de Galicia, pretenden estender o impacto positivo da innovación baseado na transformación dixital a todas as empresas galegas, especialmente ás pemes. E, deste xeito, mellorar os procesos de xestión, dentro do plan de fomento da innovación e do enfoque estratéxico das pemes innovadoras.
DATAlife Hub de Innovación Digital, con sede en Santiago de Compostela, é un proxecto concibido para “converter Galicia en bio-rexión de referencia en Europa a través da conexión, coordinación e creación de sinerxías entre os axentes do ecosistema de innovación e os sectores produtivos”. DATAlife proponse facilitar a incorporación da intelixencia artificial e a analítica de datos nas pequenas e medianas empresas (pemes) galegas dos sectores ligados ás ciencias da vida. DATAlife está ao servizo das firmas galegas para “mellorar a súa competitividade, permitíndolles aproveitar as vantaxes das tecnoloxías dixitais para vender máis, optimizaren a súa conta de resultados, ser máis eficientes e competir con maiores garantías nunha contorna global”, engaden dende o hub.
Os socios de DATAlife son cinco clústeres: Cluster Tecnolóxico Empresarial das Ciencias da Vida (Bioga), Clúster da Acuicultura de Galicia (CETGA), Cluster da Madeira e do Deseño de Galicia (CMD), Clúster da Saúde de Galicia (CSG) e Clúster TIC Galicia; cinco empresas tractoras: Grupo Zendal, FINSA, Televés, Vodafone e Noso Capital; cinco centros tecnolóxicos: Energylab, Gradiant, ANFACO-CECOPESCA; Centro de Supercomputación de Galicia (Cesga) e Centro Tecnolóxico de Investigación Multisectorial (CETIM) e o sistema universitario de Galicia: Universidade de Santiago de Compostela, Universidade de Vigo e FEUGA.

PUBLICIDADE