Dereito, Enxeñaría de Telecomunicación e AtlantTIC acadan o distintivo de igualdade da UVigo

A Facultade de Dereito, a Escola de Enxeñaría de Telecomunicación e o centro de investigación AtlantTIC súmanse á lista de centros da Universidade de Vigo que contan co Distintivo de Igualdade, que obtiveron na terceira edición desta convocatoria. A UVigo conta xa cunha lista de dez centros co recoñecemento: a Facultade de Filoloxía e Tradución, o Centro de Investigación Mariña, a Facultade de Educación e Traballo Social, a Escola de Enxeñaría de Minas e Enerxía, a Facultade de Ciencias Xurídicas e do Traballo, o Centro de Investigacións Biomédicas e a Facultade de Ciencias Económicas e Empresariais.
O Distintivo de Igualdade ten unha vixencia de seis anos e os tres centros seleccionados recibirán un vinilo e unha achega de 3.000 euros para investilos en novas actividades e políticas de xénero. Este outórgase a todos os centros que acaden un mínimo de 80 puntos atendendo a criterios como a inclusión da perspectiva de xénero nos plans de estudo e liñas de investigación e de transferencia, a organización de actividades que contribúan á sensibilización ou o grao de composición paritaria dos órganos de goberno.
Nesta terceira convocatoria o centro con mellor puntuación foi a Facultade de Dereito do Campus de Ourense, que obtivo 89 puntos. A comisión valorou o feito de que tanto nas actividades docentes como en seminarios do centro se aborden contidos relacionados coa igualdade.
A Escola de Enxeñaría de Telecomunicación, con 87 puntos, e AtlantTIC, con 86, son as outras dúas candidaturas. En ambos casos, recalca a directora da Unidade de Igualdade, Águeda Gómez, “existe unha longa tradición de persoas moi implicadas, como por exemplo no programa Elas Fan CienTec para o fomento de vocacións STEM entre as mozas”.
A comisión avaliadora, ademais do reitor, Manuel Reigosa, e da directora da Unidade de Igualdade, Águeda Gómez, estivo formada por catro expertas en igualdade e inclusión: Elisabet Mas de les Valls, docente da Politécnica de Catalunya; Concepción Torres, da Universidade de Alacante; M. Lluïsa Faxedas, da Universidade de Girona e Mar Sobral, profesora da Universidade de Santiago de Compostela.