Disney+ chegará a España o 31 de marzo

O vindeiro día 12 estrearase nos EE.UU. o servizo de vídeo baixo demanda Disney+ a un prezo de 6,99 dólares/mes incluíndo contidos de selos tan importantes como Disney, Pixar, Marvel, Star Wars ou National Geographic, entre os que haberá máis de 25 series orixinais e 10 filmes orixinais durante o primeiro ano e, aínda que había rumores que apuntaban que non poderiamos gozar deste servizo en España até finais de 2020 por certas dificultades legais (froito da existencia da canle Movistar Disney), finalmente non haberá atrancos e a compañía anunciou hoxe que Disney+ botará a andar en Reino Unido, Irlanda, Alemaña, Francia, Italia e España (xunto con algún outro país por confirmar) o 31 de marzo. Tamén detallan que nos Países Baixos poderán gozar do servizo dende o día 12, xa que foi o país elixido por Disney para a realización do programa piloto do servizo.
Este lanzamento vai contrastar enormemente co de Apple TV+, servizo que comezou a operar simplemente cos seus contidos orixinais (que case poderían verse na súa totalidade nunha maratón de fin de semana), xa que Disney+ presume dun catálogo de máis de 7.500 episodios de series de televisión (entre as que haberá producións novas como The Mandalorian e clásicos como Los Simpson) e máis de 500 películas (entre as que destacan os últimos éxitos da Marvel).