Dous galegos habilitan unha web para apoiarmos economicamente ás familias en perigo de desafiuzamento

Entre as cuestións que máis rexeitamento popular provocan atópase sen dúbida o desafiuzamento das persoas. Dun tempo a esta parte, tense constatado, nas redes e a pé de rúa, unha vaga de indignación por mor das familias que fican na rúa debido xeralmente á imposibilidade do pago mensual ás entidades que, casualmente, son en boa medida culpables desa imposibilidade (a crise económica, laboral e social): as entidades bancarias. Co fin de canalizar todo este movemento popular cara a fins prácticos, cara a medidas de axuda ás devanditas familias, dous galegos veñen de pór en marcha Doafund.com, unha páxina que funciona como un servizo de apadriñamento de fogares en risco de desafiuzamento.
Ou sexa, que quen contribúa á causa desta páxina, estará botándolles unha man, no pago das cotas hipotecarias, ás persoas que arestora teñan atrancos para sufragalas e aprazar, deste xeito e a poder ser de maneira definitiva, o intre no que as entidades bancarias inicien os procesos de botalas fóra das súas vivendas. A web, que segue o ronsel das moitas iniciativas 2.0, solidarias, creadas para dar corpo ao potencial de compromiso social da comunidade en liña, vén da man de Fernando Sierra, que quere pór freo a un proceso que, na nosa terra, desembocou en máis de 3.000 desafiuzamentos no que vai de ano. A través da súa páxina, vainos ser posible, como persoas-internautas, empresas ou familias, axudar a quen estea en proceso de ser botado da súa vivenda, sexa aquí ou en calquera punto do Estado, comprometéndonos a patrocinar as devanditas cotas mensuais.