En Rianxo, aprobada a solicitude para colocar unha antena de telefonía móbil no monte de Leiro
martes, 7 de febreiro do 2023
Rianxo
enfiou o mes de febreiro con importantes novidades tecnolóxicas que
redundan en melloras importantes de conectividade para a cidadanía,
con todo o que iso implica: un concello mellor conectado é tamén un
concello con meirandes oportunidades sociais, económicas,
estruturais, demográficas e culturais, alén do importante factor
anti-despoboamento que poñen en xogo as novas ferramentas.
Entre
as ditas novidades tecnolóxicas figura
a aprobación, este 2 de febreiro en xunta de Goberno local, dunha
solicitude para a colocación dunha antena de telefonía móbil no
monte de Leiro á altura de Abuín, coa finalidade de “mellorar
a deficiente cobertura móbil existente en gran parte da parroquia,
desde A Pedreira e Brión até Rial e Palleiro, etc”.
O
Concello explicou que esta mellora da cobertura vén cumprir un dos
obxectivos que a Secretaría de Estado de Telecomunicacións e
Infraestruturas Dixitais perseguía ao abrir unha consulta pública
de incidencias na cobertura de telefonía móbil, que o Concello de
Rianxo trasladou á veciñanza nunha enquisa pública hai agora un
ano.