Entregados en Vigo os terceiros premios Girl Geek COVID

A terceira edición dos Premios GirlGeekCOVID, a iniciativa enmarcada na Cátedra de Feminismos 4.0 que promoven a Deputación de Pontevedra e a Universidade de Vigo, entregou este xoves 9 de febreiro, na sede da institución en Vigo e coa presenza da presidenta provincial, Carmela Silva, e do reitor, Manuel Reigosa, os galardóns que recoñecen os mellores expedientes femininos nas carreiras de ciencias, enxeñaría e tecnoloxías. Quíxose deste xeito reivindicar as importantes contribucións das mozas a estes estudos, onde segue a haber sobre presenza masculina.
As galardoadas co primeiro premio en ciencias e enxeñaría foron Esther Lago Sampedro e Henar Mariño Bodelón, respectivamente, e no caso dos accésit Iliana Durán Alonso obtivo o correspondente a ciencias e Laura Núñez Álvarez o de enxeñaría.
A apertura do acto correu a cargo da presidenta da Deputación, Carmela Silva, que se referiu ás premiadas como “un orgullo” e “unha alegría” e para as que augurou “un futuro cheo de éxitos, xa que comezan cun recoñecemento á súa excelencia académica, nin máis nin menos”.
O reitor da Universidade de Vigo, Manuel Reigosa, na súa intervención, fixo referencia aos “esforzos que estades facendo neste camiño no que estamos todas xuntas e xuntos para mudar o mundo e a sociedade”.`

As premiadas

“Estes premios son importantes porque permiten que as nenas poidan animarse a escoller estas ramas do coñecemento no futuro”, recalcou tras recoller o premio Esther Lago Sampedro, estudante do Grao en Química da Universidade de Vigo e gañadora na categoría de Ciencias.
No caso da gañadora na categoría de enxeñaría e estudante do mestrado de Enxeñaría de Telecomunicación, Henar Mariño Bodelón, aludiu á “importancia desta iniciativa par reivindicar e visibilizar o traballo das mulleres no ámbito STEAM” e manifestou o seu desexo de que “haxa máis mulleres no futuro estudando e traballando no mundo da tecnoloxía”.
Pola súa banda, Iliana Durán Alonso, accésit na rama de ciencias e alumna do Grao en Bioloxía, apelou á necesidade de “destruír barreiras e seguir traballando para visibilizar ás mulleres referentes no ámbito científico, para construír un mundo máis xusto e equitativo, mellor para as persoas”.
Por último, Laura Núñez Álvarez, alumna do Mestrado Universitario en Enxeñaría Industrial e accésit na rama de enxeñaría, resaltou que “é importante que a sociedade teña claro que as mulleres podemos ter éxito e somos totalmente necesarias en todos os ámbitos profesionais. Os estereotipos de xénero non deberían ser un impedimento á hora de escoller unha carreira profesional”.
Os galardóns, que naceron para incentivar, apoiar e fomentar os estudos STEM entre as mulleres e están impulsados pola Deputación e a UVigo, mudarán de nome na súa próxima edición para deixar atrás o termo “COVID” que fai referencia a unha etapa afortunadamente superada. A presidenta Carmela Silva foi a encargada de dar a coñecer a nova nomenclatura dos galardóns que o vindeiro curso pasarán a denominarse Girl Geek Power.