Enxeñaría Aeronáutica (Campus de Ourense) convoca o concurso de fotografía AeroVision 2023

Co gallo do Día Internacional dos Voos Espaciais Tripulados e o Día da Cosmonáutica (12 de abril), na que se conmemora o comezo da era espacial, a Escola de Enxeñaría Aeronáutica e do Espazo do Campus de Ourense convoca o concurso de fotografía AeroVision 2023, no que se premiarán as mellores imaxes do ámbito aeronáutico e aeroespacial.
A iniciativa ten como obxectivo “recoñecer e difundir o papel da ciencia e a tecnoloxía espacial no desenvolvemento da sociedade”. As imaxes a presentar teñen que ser orixinais e deberán amosar situacións, paisaxes ou circunstancias relacionadas co ámbito aeronáutico e/ou aeroespacial. As obras gañadoras serán elixidas por un xurado formado por representantes do sector aeronáutico e/ou aeroespacial e da fotografía e unha persoa do equipo directivo da Escola de Enxeñaría Aeronáutica e do Espazo de Ourense. As fotografías gañadoras exporanse temporalmente en instalacións do Campus de Ourense xunto coas do resto de participantes.
A entrega de premios e o acto de inauguración da exposición temporal das fotografías terá lugar o Día Internacional dos Voos Espaciais Tripulados e o Día da Cosmonáutica, o 12 de abril de 2023.
Os premios do concurso son tres. O primeiro premio estará dotado cun dron, o segundo cun telescopio e o terceiro cuns prismáticos. As fotografías presentadas ao concurso pasarán a ser propiedade exclusiva da escola organizadora, non podendo ser utilizadas polo autor ou autora noutros concursos ou publicacións e podendo a Escola de Enxeñaría Aeronáutica e do Espazo facer o uso que considere oportuno das mesmas, facendo referencia á súa autoría. A data límite de recepción de fotos, cuxo envío se realizará vía electrónica coas características indicadas pola organización nas bases do certame, é o 26 de marzo.