España está por enriba da media europea en materia de competencias dixitais da cidadanía

O Observatorio Nacional de Tecnoloxía e Sociedade (ONTSI) presentou unha nova colección de monográficos sobre a estratexia España Dixital 2026. O primeiro dos monográficos, chamado Competencias dixitais, lanza importantes datos sobre o nivel de implantación social das novas ferramentas no ámbito estatal. No estudo faise saberque España está por enriba da media en materia de desenvolvemento das competencias dixitais da cidadanía.
En concreto, o impulso das administracións e da sociedade no seu conxunto neste sentido, lograron que en España un 64% da poboación dispoña de competencias dixitais polo menos básicas, ocupando o sexto lugar e por diante de países como Francia (62%) e Alemaña (49%), achegándose o país ao obxectivo de que o 80% da cidadanía conte con estas competencias, marcado pola Comisión Europea para 2030. Ademais, o monográfico sinala que España conseguiu reducir a fenda dixital por cuestión de xénero, habendo unha diferenza de 3 puntos porcentuais nestes momentos (63% das mulleres fronte ao 66% dos homes). Isto tamén posiciona a España no 6.º posto da clasificación da Unión Europea.
Porén, as maiores brechas en competencias dixitais danse en función da idade, con 58 puntos de desvantaxe entre a poboación maior fronte á máis nova. A diferenza en función da ocupación é a segundo maior brecha, de 49 puntos, entre poboación non activa e estudantes.
Destácase tamén que máis da metade das persoas en situación de desemprego posúe competencias dixitais básicas ou superiores.
O monográfico convida a reflexionar sobre a importancia de que todos os grupos poboacionais poidan adquirir estas competencias en igualdade de condicións, de forma que se reduzan as brechas que aínda existen á hora de afrontar os retos e oportunidades da economía dixital.