Este sábado celébrase en Santiago unha nova edición do XantarDev
xoves, 6 de xuño do 2019
Este
sábado 8 de xuño temos en Santiago unha nova edición (a terceira)
do encontro tecnolóxico XantarDev,
unha cita para facer comunidade, fronte común e irmandade arredor
das ferramentas e servizos dixitais máis avanzados e colaborativos.
A cita, novamente impulsada polo grupo local XantarDev Team,
celébrase unha vez máis no CSC do Castiñeiriño. Está previsto
que a xornada comece ás 9 da mañá e se clausure ás 18:30 da
tarde. Como novidade para esta edición, e de forma voluntaria, cada
asistente poderá entregar produtos perecedoiros que serán doados ao
Banco de Alimentos.
Desta
volta, o evento está formado por media ducia de charlas de
diferentes temáticas. Pola mañá, Estefanía Otero mostrará como
montar unha arquitectura de información a gran escala (Big Data)
usando Google Cloud. Amais, Bernal Varela fará unha introdución ao
framework gRPC e, trala pausa para o café, Jose Sendín
axudaranos a comprender as licenzas de software nunha linguaxe máis
humana. Logo será a quenda de Cristina Barreiro e Esther Álvarez,
que falarán de TDD e de boas prácticas no mundo do testing.
Pola tarde, Daniel Rey falará de Alexa e Arduino e de como poden
entenderse. Rematará a xeira de intervencións Fernando Blanco cunha
charla sobre Big Data e BI.
Este
ano o evento conta co apoio e patrocinio, ademais do Concello de
Santiago de Compostela, de Tokiota, Plexus e Kabel con, cuxas
contribucións, cóbrense os gastos tanto do café como da comida,
así como “dalgunhas sorpresas que se desvelarán o día do
evento”, anuncia a organización.