Feuga axúdalle aos empresarios galegos a mellorar a súa competitivade coas TIC

A fin de contribuir á mellora da productividade e a competitivide das empresas galegas, o BIC Galicia, en colaboración coa Fundación Empresa Universidade Galega (FEUGA), veñen de anunciar o desenvolvemento do Programa de Talleres de Mellora Competitiva TMC, que levan a cabo conxuntamente para axudar aos empresarios galegos a posicionarse mellor no mercado.
Estes obradoiros, que darán comezo o vindeiro 29 de maio, teñen como filosofía a realización de actuacións que contribúan á implantación efectiva de procesos de mellora nas empresas a través do emprego de novidosas técnicas e ferramentas de xestión empresarial, e baséase nun método de traballo asistido, interactivo e práctico.
O Programa de Talleres de Mellora Competitiva TMC achegará, asemade, a análise de casos particulares das empresas participantes, combinando aprendizaxe con acción para facer máis amenas as xornadas.
Guiados por un “consultor-facilitador”, especialista na implantación de proxectos de mellora e con ampla experiencia na temática do obradoiro, serán as propias empresas as que analicen a posible aplicabilidade das melloras propostas nas súas organizacións, seleccionando o proxecto de mellora concreto que se queira acometer.
A actividade, que vai dirixida a responsables e empregados de empresas de calquera sector (directivos, mandos intermedios, técnicos, profesionais…), ten como principal obxectivo explorar as oportunidades estratéxicas e operativas que xorden no marco de aplicación das TIC nos procesos de negocio, así como darlle a coñecer aos asistentes as infraestructuras, tecnoloxías e ferramentas da información e a comunicación que teñen á súa disposición.
Asemade, os asistentes adquirirán coñecementos básicos para a optimización e mellora dos procesos de xestión así como para a mellora do rendemento a través das TIC.
Esta oferta formativa, que está limitada a un máximo de dez empresas por obradoiro (a razón de catro persoas por empresa), é de balde e a inscripción á mesma realizarase por riguroso orde de recepción de solicitudes.
A páxina web de Feuga recolle as bases do taller así como o seu folleto de inscrición.