Google mellorará a integración da intelixencia artificial en Google Workspace

martes, 14 de marzo do 2023 Marcus Fernández

Conscientes de que OpenAI presentaba hoxe GPT-4 dende Google aproveitaron a ocasión para deixar caer que levan moito tempo traballando coa intelixencia artificial e anunciaron unha nova era para a intelixencia artificial e Google Workspace, de xeito que agora poñen a dispositivo dalgúns usuarios as ferramentas de escritura baseadas en IA en Docs e Gmail, potenciando así a produtividade.
Workspace está evolucionando para incorporar a intelixencia artificial en Gmail, Docs, Presentacións, Follas de Cálculo, Meet e Chat, pero que polo momento só están dispoñibles para un grupo selecto de usuarios que probarán estas posibilidades como elaborar borradores, responder, resumir e priorizar en Gmail; desenvolver ideas creativas, revisar, escribir e reescribir en Docs; impulsar a creatividade a través de imaxes, audios e vídeos xerados automaticamente en Slides; transformar datos sen procesar en información e análises con auto completado, xeración de fórmulas e categorización contextualizada en Follas de Cálculo; xerar novos escenarios e escribir notas en Meet; e habilitar fluxos de traballo para que as cousas sucedan en Chat.
Unha vez máis Google anuncia avances en intelixencia artificial, para contraprogramar á competencia, pero sen presentar cousas concretas xa dispoñibles para os usuarios, dando a entender que esta tendencia pillounos fóra de xogo.
Onde si concretaron é na posibilidade de que os desenvolvedores poidan facer uso da intelixencia artificial xenerativa nas súas aplicacións a través da PaLM API, e tamén presentaron un novo contorno de creación de prototipos chamado MakerSuite. Google tamén está traballando no achegamento das capacidades da intelixencia artificial xenerativa a Google Cloud.

PUBLICIDADE