Impresionantes vendas de Street Fighter IV no Xapón

O vindeiro venres chega ás tendas españolas para PS3 e Xbox 360 o xogo Street Fighter IV, posiblemente o máis agardado da saga de Capcom, pero no Xapón xa leva uns días nas tendas, e o seu éxito é indiscutible, pois o xogo esgotou todas as súas unidades no seu día de lanzamento (aínda que se repoñen con certa normalidade) o que serían unhas 116.000 copias. En distintas páxinas web discutían que o xogo non estaba esgotado nas tendas, pero Capcom precisou que o que anunciaron foi que non venderon máis copias o primeiro día porque non distribuíron máis, polo que o xogo estaría a superar todas as expectativas, e en Europa tamén se podería repetir o éxito pois as críticas que está a recibir o xogo por parte de crítica e público (pois circulan copias do mesmo pola Rede) son moi boas, non só polo seu nivel gráfico, senón tamén pola súa xogabilidade.
Pero a chegada do xogo ás tendas españolas podería ser peor do que os afeccionados esperan, pois parece que o xogo chegará so, ou sexa, que os mandos personalizados coa súa marca (5 modelos de fightpads e 2 de fightsticks) non estarían dispoñibles ata o mes de maio (data por confirmar), o que supón unha longa espera para un tipo de accesorios que realmente estaban a agardar moitos usuarios das consolas de última xeración, que veñen cuns mandos que non están optimizados para os controis dixitais dos xogos de loita.