Iñaki Quenerapú protagonizará a edición de abril de Iniciador Santiago de Compostela

Os eventos de Iniciador teñen certa implantación en Galicia, e dende hai pouco retomaron a súa actividade en Compostela, cidade na que están a dinamizar o emprendemento con relatorios como o impartido por Roberto Pérez Marijuán en decembro e o de Santiago Moroño a semana pasada, e continuando na mesma liña confirman que a vindeira entrega será a de Iñaki Quenerapú, a quen hai pouco puidemos ver no TEDxGalicia falando do crowdsourcing que facilita a Internet (como un exemplo da teoría de Tribos de Seth Godin), e que o 9 de abril ás 19:00 no Centro de Novas Tecnoloxías de Galicia falará sobre a importancia da elección de nome comercial e marca.
Iñaki Quenerapú leva tempo traballando na comunicación a través da Internet, e co seu relatorio aplicará a súa experiencia para dar conta do peso que o nome comercial e a marca dun proxecto emprendedor de cara a facilitar a súa identificación e diferenciación, á vez que tamén deben adoptarse con intelixencia e personalidade os códigos de comunicación que son referencia no sector.