Incrementan artificialmente a visibilidade de Elon Musk en Twitter

Durante a Super Bowl Elon Musk publicou un chío animando ao equipo que finalmente perdeu o encontro (facendo o ridículo logo borrándoo e publicando outro chío animando ao equipo gañador) conseguindo acumular 9,1 millóns de visualizacións da súa publicación, o que aseguran que ofendeu ao propietario de Twitter xa que no mesmo momento un chío do presidente Joe Biden conseguiu 29 millóns de visualizacións.
Que Musk non fose o máis popular en Twitter nese momento molestouno, e provocou que pedise explicacións aos seus enxeñeiros, chegando a despedir a un dos principais enxeñeiros da compañía simplemente por asegurar que a causa era simplemente que Musk perdera popularidade.
Pero a cousa non quedaría así, e agora os chíos de Elon Musk teñen moita máis visibilidade, non porque mudase a popularidade do multimillonario sudafricano senón porque, segundo confirman dende Platformer, Musk ameazou ao resto de enxeñeiros con despedilos se non solucionaban a situación, polo que crearon un mecanismo para incrementar artificialmente a popularidade de Musk.
Aseguran que actualmente o algoritmo de Twitter multiplica por 1.000 a visibilidade dos chíos de Elon Musk, de aí que estean a provocarse efectos perversos, como que estea a aparecer de xeito prioritario para practicamente todos os usuarios de Twitter, aínda que non o sigan nin teñan interese ningún sobre o que comenta.
Aínda que esta manipulación consiga satisfacer o ego de Musk, só estaría a incrementar a desconfianza sobre as estatísticas sobre as visualizacións que conseguen os chíos, que xa eran moi pouco fiables (como se constatou mediante o rexistro de visualizacións nunha conta sen seareiros e co cadeado posto, ou sexa 0que non debería ter ningunha visualización).