Industria achega 233,6 millóns en axudas para proxectos TIC innovadores, sobre todo das PEME

Víctor Calvo-Sotelo, secretario de Estado de Telecomunicacións e para a Sociedade da Información

O Ministerio de Industria anunciou esta semana a concesión de axudas por importe de 233,6 millóns de euros a 262 proxectos TIC innovadores, que son as iniciativas presentadas á convocatoria 2012 do programa Competitividade I+D. Dos devanditos 233,6 millóns, 48 irán destinados a subvencións e 185,6 a préstamos. Segundo informa a Secretaría de Estado de Telecomunicacións e para a Sociedade de Información, que é o órgano que resolve as axudas, estas oriéntanse a acadar un axeitado desenvolvemento e emprego das novas tecnoloxías, das súas aplicacións e servizos, aos que a Secretaría considera “como instrumento para o cambio de modelo económico, xa que o afianzamento do seu uso permite e permitirá un medre da competitividade e a produtividade, favorecendo e dinamizando a economía e consolidando un crecemento sustentable”.
Os proxectos que se financian son iniciativas con clara potencialidade de convertérense en realidade e xerar beneficios propios e xerais. En palabras da Secretaría, son proxectos “de desenvolvemento experimental con solucións próximas ao mercado”. Artéllanse nas seguintes áreas temáticas e tipos:
· Internet do futuro
· Sistemas e dispositivos
· Solucións TIC para a empresa
· Seguridade
· Saúde e benestar social
· Administración pública
· Proxectos de ámbito internacional
O número de beneficiarios incluídos nos 262 proxectos financiados nestas áreas temáticas foron 411 entidades das que 208 constitúen pequenas empresas, que supoñen unha porcentaxe do 50,6; 102 medianas empresas, que representa o 24,8 % e 83 grandes empresas, cifra que anda a rentes do 20% del total. En conxunto, as PEME beneficiadas son máis do 75% dos receptores de axudas.