Ineo estreita ligazóns con entidades emprazadas en Bruxelas

Unha delegación da asociación Ineo encabezada polo presidente da plataforma galega TIC, Carlos Conde, e pola súa directora xeral, Lucía Gregorio, vén de levar a cabo unha visita institucional e empresarial a Bruxelas co obxectivo de coñecer de primeira man as oportunidades de índole europea para o noso sector tecnolóxico-dixital. No transcurso da misión empresarial os integrantes de Ineo estreitaron lazos de colaboración con diversas entidades e organismos de cara a impulsar a colaboración e o espallamento das empresas galegas.
En primeiro lugar, visitaron a sede da Comisión Europea e centráronse no Programa Horizonte 2020, amais de manter un encontro cos representantes da Axencia Executiva para as PEME (EASME), organismo delegado da Comisión para os servizos ás pequenas e medianas empresas e responsable da execución do programa COSME, e os Fondos Comunitarios do Instituto Español de Comercio Exterior (ICEX).
Ademais, mantiveron un xantar coa directora da Oficina da Fundación Galicia Europa en Bruxelas, Ana Ramos Barbosa, e os eurodeputados galegos José Blanco (PSOE) e Francisco Millán Mon (PP), co obxectivo de achegarlles a nosa visión das novas tecnoloxías nos traballos que ambos realizan no Parlamento e nas Comisións nas que participan en relación con Latinoamérica, para establecer ligazóns de colaboración estables.