Inforhouse, no programa de capacitación de provedores sustentables da Rede Española de Pacto Mundial

A tecnolóxica galega Inforhouse, con sede en Santiago, está a participar a día de hoxe na primeira edición do Programa de Capacitación: Provedores Sustentables, que organiza a Rede Española de Pacto Mundial, que depende da ONU, o ICEX e a Fundación ICO. Este programa está orientado a empresas provedoras de diversos sectores e pretende que as pemes españolas e doutras nacionalidades cumpran e se sumen ao compromiso do Pacto Mundial, implantando medidas encamiñadas a garantir os Obxectivos de Desenvolvemento Sustentable (ODS).
Participar nesta primeira edición permitirá a Inforhouse ser fornecedora sustentable de servizos e recursos dende unha fase anterior a outras moitas empresas provedoras, dando así resposta primeira, e de base, á esixencia de requisitos das grandes firmas e da sociedade. A entrada a este programa é por convite. No caso de Inforhouse, foi Navantia a responsable da invitación, tras o proxecto desenvolvido en 2022 sobre solucións na nube de IBM.
A empresa de Santiago informa que “a sustentabilidade e o Pacto Mundial non son algo novo para nós, onde xa aprobamos a nosa primeira política de Responsabilidade Social Empresarial no ano 2017, e dende aquela a evolución foi unha constante”.
En 2018 implantouse en Inforhouse, formalmente, un modelo estandarizado para a xestión sustentable e RSE: estándar GRI, contando con verificación externa pola entidade acreditada do devandito informe de sustentabilidade.
A empresa de Santiago explica que “dende o primeiro momento integrouse no informe un apartado para medir e verificar a aproximación ao cumprimento dos Obxectivos de Desenvolvemento Sustentable de Pacto Mundial. Así, había unha fotografía do estado de cumprimento dos ODS, realista e que permitía avanzar e mellorar o sistema global de sustentabilidade e RSE”.
En 2021, para “mellorar a xestión do aspecto laboral”, implantouse e certificouse na empresa galega un modelo EFR 1000-2, que acreditou a vertente de Inforhouse como Empresa Familiarmente Responsable, verificando que existen medidas de conciliación para o equipo de traballadores, medidas que, nalgúns casos, levaban implantadas desde facía varios anos.
Estes modelos e sistemas de RSE e EFR están integrados no sistema de xestión, de tal xeito que están aliñados coa xestión da calidade, medio ambiente, servizos TI e seguridade da información, aspectos axustados a Normas ISO. “Isto”, informa a empresa de Santiago, “garante a continuidade dos modelos, o aliñado coa estratexia empresarial global e a procura dunha mellora continua en todo momento, en todos os ámbitos de xestión”.