Italia venderá licenzas WiMAX en 2007

As tecnoloxías de comunicación sen fíos para equipos informáticos emerxeron nos últimos anos ata converterse nun elemento cotiá que incluso vén de serie nos ordenadores portátiles e este éxito levou a potenciar estas solucións de xeito que nos vindeiros anos veremos novas solucións de comunicación mediante ondas de radio como WiMAX, que permitiría coberturas de ata 48 quilómetros a velocidades de ata 70 Mbps de xeito que serviría tanto para datos como para telefonía e televisión, supondo toda unha alternativa para o caro despregue de infraestruturas de cable, e que agardan que sexa un negocio moi rendible, polo que en Italia xa anunciaron que venderán licenzas para esta tecnoloxía a partires do vindeiro mes de xuño.
O Goberno italiano agarda poder ingresar entre 100 e 200 millóns de euros polas vendas destas licenzas, que resultarían atractivas tanto para distintas empresas tanto de telecomunicacións como audiovisuais.
Italia sería así un dos primeiros países europeos en vender licenzas WiMAX tras Francia, Alemaña e Grecia, e este tipo de tecnoloxía conta con reticencias por parte dos operadores que pagaron enormes sumas para facerse con licenzas UMTS que resultarán difíciles de amortizar de imporse esta nova tecnoloxía.