Lorenzana visita a sede de Teimas e destaca o potencial do programa Investigo

A Consellería de Promoción e Emprego e Igualdade compartiu este venres 24 de febreiro os detalles do programa Investigo, iniciativa laboral xuvenil que conta este ano cun orzamento de 9,1 millóns, que se destinarán a achegar axudas á xente nova. Estes apoios, en termos máis concretos, diríxense á contratación de persoas mozas demandantes de emprego para levar a cabo proxectos en calidade de investigadoras, tecnólogas, persoal técnico e outros perfís profesionais en I+D+i. Os detalles foron achegados pola conselleira María Jesús Lorenzana.
Lorenzana puxo en valor esta iniciativa na visita que realizou á empresa Teimas Desenvolvemento, en Santiago de Compostela, beneficiaria destes apoios en 2022, cando arrancou por primeira vez esta actuación da Consellería. Con estes apoios, a Administración autonómica financia os custes laborais e salariais, incluíndo os gastos de cotización por todos os conceptos á Seguridade Social.
Investigo, sinalou, forma parte dun proxecto máis amplo, o Plan Emprega Xuventude, que con 30 millóns de orzamento este ano está dirixido en exclusivo a impulsar o emprego entre a mocidade galega, en concreto, estímase a contratación de máis de 2.000 mozas e mozos en 2023 a través dos apoios do Plan.
“Co programa Investigo apostamos pola xeración de emprego xuvenil en Galicia no eido da investigación, a tecnoloxía e a innovación”, apuntou Lorenzana, quen engadiu que a iniciativa pon o foco no talento da xuventude e favorece o seu acceso ao mercado laboral da man de empresas comprometidas.
De todo o devandito puxo como exemplo a firma Teimas Desenvolvemento, que basea o seu labor na dixitalización da cadea de valor do residuo, é dicir, a través de solucións tecnolóxicas axudan ás empresas no seu avance cara a economía circular e a descarbonización, contribuíndo, deste xeito, á potenciación dos recursos naturais e da saúde das persoas.