Máis dun centenar de persoas participaron na gran festa de Youbeir@s

luns, 29 de maio do 2017 Redacción

Esta fin de semana que vimos de deixar atrás foi a gran festa dos contidos en galego lanzados para o mundo. Por que? Pois porque se celebrou en Ourense, coa participación de máis dun centenar de persoas, a entrega de premios premios do certame Youtubeir@s, unha iniciativa para encher a Internet de vídeos en galego, facendo especial fincapé no YouTube e no seu potencial de divulgación e de influencia. Segundo puidemos saber, as pezas premiadas foron un vídeo de opinión sobre a problemática da praga da couza guatemalteca e un videotitorial sobre como facer un guiso anti-San Valentín.
A gala final da primeira edición de Youtubeir@s desenvolveuse o venres no Teatro Principal de Ourense. “Con este acto”, lembraron os organizadores, “culminou un proxecto que naceu coa vontade de conseguir que haxa máis vídeos en galego en Internet e co fin último de fomentar a presenza e o uso deste idioma na Rede”. Tamén se destacou a colleita de vídeos resultante, tanto por cantidade (máis de 200) como sobre todo por calidade.
Como dixemos, na categoría Vídeo-facermos o premio foi para a peza Guiso especial anti-San Valentín, realizada polas youtubeiras de Corasón de Churrasco. Na categoría Vídeo-opinarmos o galardón foi para Prohibido plantar patacas: a praga da couza guatemalteca, das youtubeiras de Teño unha Horta en San Sadurniño, que recolleron o premio “con orgullo de ter chegado ata aquí” e reclamando “máis mulleres rurais e máis galego na rede”. Cada un dos galardóns estaba dotado con 1000 euros.
Tamén se entregaron diversas mencións honoríficas, dotadas con 500 euros de premio. A mención especial polo enxeño e creatividade foi para David Otero Fumega polo seu vídeo SmartFol G6! Unha review moi especial e o premio que destacou a eficiencia comunicativa foi asignado ao videotitorial Tortilla de Pascua, da youtubeira Isabel Villanueva. A mención de honra á calidade técnica recibiuna Miguel Rodríguez pola súa vídeo-opinión 1000 rpm-A noite e o recoñecemento á calidade lingüística foi para o IES Urbano Lugrís de Malpica pola peza colectiva Seis pasos para falar malpicán.
A gala foi presentada pola actriz Iria Pinheiro. Pola súa banda, Iñaki Quenerapú fixo un monólogo sobre “a importancia de elixir ben a miniatura estática nos vídeos de YouTube” e a Vj Marta Verde realizou un espectáculo de mestura cos vídeos participantes en directo. O acto contou coa asistencia de máis dun centenar de persoas, entre concursantes, público e representantes institucionais dos concellos e universidades promotoras do certame. Entre eles e en representación das universidades implicadas, Virxilio Rodríguez, vicerreitor do Campus de Ourense, quixo dar as grazas aos participantes no certame “por ter presente o galego nas vosas vidas e por telo levado á Rede” e salientou o compromiso dos campus galegos co uso do galego. O vicerreitor rematou o seu discurso desexando “moita vida ao noso idioma”. Pola súa banda, os responsables de Normalización Lingüística dos concellos de Ourense e Pontevedra, María Belén Iglesias e Alberto Oubiña respectivamente, amosaron o seu desexo de que o certame de Youtubeir@s teña continuidade de futuro.
Máis detalles sobre o certame
O xurado estivo composto por Manolo González, María Lado, Manuel Núñez Singala, María Yáñez e Pablo Lamosa. Youtubeir@s, como lembraremos, foi unha iniciativa dos servizos de normalización lingüística (SNL) dos concellos da Baña, A Coruña, Ames, Carballo, Mazaricos, Ourense, Pontevedra, Ribadeo, Santiago de Compostela, Teo e O Grove; e tamén das universidades da Coruña, Santiago de Compostela e Vigo.
O proxecto tivo tres piares fundamentais: a procura de youtubeiras e youtubeiros, a formación para quen queira selo, e un concurso para incentivar que se fagan vídeos de titoriais e opinións en galego na Rede, con 4.000 euros en premios-
Os vídeos que se presentaron ao certame tiveron unha duración máxima de 5 minutos, estaban licenciados en creative commons (licencia aberta, feita para produtos que se queren compartir e co requisito de acreditar de autoría) e foron producidos en galego e habilitados na rede social YouTube.
As dúas categorías foron Vídeo-facermos (para videotitoriais que amosen como facer cousas) e Vídeo-opinarmos (para vídeos nos que se achegue unha opinión ou valoración sobre calquera tema.

PUBLICIDADE