Medra a carteira de clientes de Euskaltel en todos os seus servizos

O Grupo Euskaltel, que integra as marcas Euskaltel, Telecable e máis a galega R, presentou esta semana os seus resultados de actividade relativos ao segundo trimestre de 2019. No informe, como dato destacable de apertura, reflíctese “un cambio na tendencia de evolución do negocio” ao longo do devandito período. Euskaltel salienta o crecemento na base de clientes e na rendibilidade, cunha suba do 4% do EBITDA (beneficio bruto estimado antes de deducir gastos financeiros) e cun aumento de usuarios en todos os servizos: banda larga, televisión de pago, telefonía móbil e telefonía fixa.
Os ingresos acadaron os 171,1 millóns de euros impulsados polo crecemento do 1,3% no mercado masivo, “grazas ao éxito do plan de expansión nos novos territorios”, explican fontes do grupo, engadindo que os ingresos ascenden finalmente a 342,8 millóns de euros no semestre.
O beneficio bruto de explotación medrou como dixemos un 4% sobre o trimestre anterior, chegando aos 84,4 millóns de euros, cunha marxe sobre ingresos do 49,4%, o que representa “un máximo histórico no últimos cinco trimestres”, explica o grupo, apuntando que esta taxa supón un medre de 210 puntos básicos. En total, 165,5 millóns de euros no semestre.
A base de clientes de mercado masivo creceu en 4.000 novos usuarios, ata alcanzar os 772.000 usuarios dos servizos do grupo no dito período, volvendo á tendencia de crecemento. A comunidade de Euskaltel, R e Telecable supera desta maneira os 2,8 millóns de produtos contratados, o que supón unha suba de máis de 43.000 novos contratos.
A base de clientes de alto valor crece no segundo trimestre do ano:
· 24.000 novas liñas de móbil postpago, indo alén dos 1,15 millóns de liñas.
· 7.000 novos servizos de banda larga, ata alcanzar os 587.000.
· Aumento de 10.000 novos usuarios en televisión de pago, superando os 465.000, cunha penetración superior ao 60% sobre a base de clientes.
· Os servizos de voz fixa medra en 3.000, sumando máis de 621.000.