Meta e Amazon no punto de mira da Comisión Europea

A Comisión Europea está a abordar estes días conflitos con xigantes tecnolóxicos, como son Meta e Amazon. No que se refire a Meta, a Comisión informou á compañía estadounidense dos seus achados preliminares sobre infraccións das normas de competencia dentro do Facebook Marketplace; mentres que con Amazon terían chegado a un acordo sobre os problemas detectados tamén no seu marketplace.
A Comisión considera que Meta abusa da súa posición dominante en redes sociais ao facer que os seus usuarios poidan acceder directamente ao Facebook Marketplace, á vez que tamén impón condicións inxustas aos servizos que tamén teñen anuncios clasificados e que se anuncian a través de Facebook e Instagram. De confirmarse os indicios Meta sería sancionada polas súas prácticas.
Por outra banda, tras informar a Amazon das súas prácticas anticompetitivas, o xigante do comercio electrónico comprometeuse a unha serie de prácticas para non prexudicar ás empresas que vende a través do seu marketplace. Entre os compromisos adoptados por Amazon está que non empregará os datos dos vendedores para beneficiar as súas propias vendas (información que até o momento emprégase para tomar decisións sobre que produtos lanzar, os seus prezos e incluso o control de inventario), non aplicará criterios nin condicións discriminatorias nos botóns de compra (ofrecendo tamén un segundo botón no que dar maior visibilidade a vendedores independentes), e tamén flexibilizará as condicións do programa Prime, para que os vendedores poidan negociar a loxística dos pedidos libremente (así como manexar a comunicación durante as entregas sen a intervención de Amazon).
Amazon deberá cumprir as prácticas ás que se comprometeu nun máximo de 6 meses.