Mobilización na Rede para enviar unha canción en galego de xeito colectivo o 17 de maio

venres, 13 de maio do 2011 Fernando Sarasketa

A festa das nosas Letras do 17 pódese celebrar de moi diversas maneiras, pero se cadra unha das que veñen máis a conto é a través das redes, tendo en conta que o 17 tamén se celebra o Día de Internet. E, se finalmente optamos por este vieiro dixital, que mellor que tirarlle partido ás redes sociais e facemos que a nosa mensaxe de defensa da lingua galega chegue á meirande cantidade de recantos posibles? Esta é a estratexia de Agasallo sincronizado para o mundo, iniciativa da que xa falamos o outro día nesta web e que vén de coller novos folgos coa participación directa de máis de 800 usuarios dos ditos servizos 2.0. O seu cometido será o seguinte: o día 17 enviarán un correo electrónico cunha canción na nosa lingua para facer que o galego se escoite en todo o mundo. De aí o de “agasallo sincronizado”. A proposta está aberta a quen desexe unirse aos apoios xa confirmados.
Con todo, informan os responsables da proposta, o proxecto non consiste só en enviar unha melodía. Co apoio das redes sociais e máis GalegoLab, a plataforma en liña de promoción colectiva do galego, ate ó día 17 preténdese animar aos internautas a coller a partitura orixinal do devandito tema e facer a súa propia versión. Por certo que melodía xa está dispoñible na Rede, para quen queira enriquecela.
Segundo se pode ver na web principal da iniciativa, un espazo específico na páxina de YouTube, arestora xa foron achegadas unha ducia de versións, compartindo a mesma base pero con múltiples particularidades. De feito, veñen da man dun ben variado abano de artistas, entre os que se conta a Tuna de Santiago, Alba Messa ou Tonhito de Poi e Milo Romero.
Para quen queira participar na iniciativa sen canción, só como internauta implicada ou implicado, dicirlle que o día 17 terá que escoller a súa versión preferida e enviala aos seus contactos como forma de celebrar o Día das Letras Galegas e facer que a nosa lingua se escoite en todo o mundo. “A proposta non é facer spam (envíos masivos e indiscriminados de correos electrónicos)”, sinalan os responsables da mobilización, “senón ofrecerllo de xeito agarimoso a quen o saiba apreciar”.
Logo, quen reciba o correo e escoite a canción compartirá un xesto repetido milleiros de veces ó longo de moitos quilómetros.
Como a súa promotora Eva Wojkiewicz quere salientar, os obxectivos da convocatoria son demostrar en positivo:
1.-Que a nosa lingua está viva.
2.- Que non é soamente cousa de vellos.
3.- Que somos moitos os que a defendemos estando ao día e utilizando os medios máis modernos como a Internet e as redes sociais.

PUBLICIDADE