Netflix trunfa nos Oscars

A pasada noite celebrouse a gala dos Oscars, cun éxito sen precedentes por parte de Todo a la vez en todas partes (cos premios a mellor dirección, mellor filme e a 3 dos 4 premios de interpretación) quedando basicamente sen o premio ao mellor protagonista masculino (que foi parar a mans de Brendan Fraser polo seu papel en La Ballena) ao que non optaba, polo que poderiamos asegurar que houbo un claro vencedor desta edición.
Pero o resto de categorías conseguiron tamén deixar pegada, especialmente entre as plataformas de streaming, que levan tempo apostando por este tipo de galardóns para lexitimar a súa posición no mercado, e desta volta é Netflix quen poden saír coa cabeza ben alta, xa que o filme alemán Sin novedad en el frente conseguiu facerse cos premios a mellor película de fala non inglesa, mellor fotografía, mellor deseño de produción e mellor banda sonora, de xeito que a segunda película máis premiada desta edición corresponde a unha plataforma en liña, de xeito que o peso de Netflix na gala xa non queda nunha anécdota.
Cómpre salientar que o feito de que Pinocho de Guillermo del Toro se fixese co premio á mellor película de animación, superando a grandes estudios como DreamWorks, Sony e Pixar, está a considerarse como o grande éxito de Netflix da noite, por dominar unha categoría tan competida. O éxito do filme tamén casa moi ben coa campaña iniciada por Netflix para reivindicar que o cine de animación non é exclusivo do público infantil.
Nuestro bebé elefante tamén levou o premio á mellor curta documental, completando unha noite de premios que axudan a mellorar a imaxe de Netflix nun momento tan complicado como o actual, no que está a vivir unha crise de reputación agravada pola consolidación doutras plataformas, que fan que os espectadores cada vez dubiden máis sen manter a súa subscrición, polo que toda achega que contribúa a mellorar a percepción da marca de seguro que resulta benvida.