O CEO de Unicoos convida á comunidade escolar galega a apostar pola formación motivadora e tecnolóxica
mércores, 25 de xaneiro do 2017
Hoxe,
segunda xornada do evento DICO
Summit 2017, falouse moito na Cidade da Cultura de recursos,
ideas, propostas e tecnoloxías para o que viña sendo dende a súa
orixe o leit motiv do congreso que organizan AMTEGA e os nosos
clústers do audiovisual e das TIC: facermos entre todas e todos un
mundo mellor. Esta arela de asegurar un futuro mellor que o noso
presente e o noso pasado foi a base, precisamente, da intervención
ás 10.30 horas de David Calle, director executivo de Unicoos,
a academia en liña de meirande éxito de España (e o terceiro
portal educativo científico-tecnolóxico do mundo). Calle pechou a
súa intervención dicindo que con toda a información e a tecnoloxía
que temos ao noso alcance, non lle cabe dúbida de que a mocidade de
hoxe en día está en disposición de optimizar o legado deixado
polas xeracións anteriores. “Só fai falta motivalos”. E diso,
de motivar, é do que trata Unicoos.
Segundo
explicou, unha das bases de Unicoos reside na crenza firme de que
todas e todos atesouramos altas capacidades, todos somos “únicos”,
precisamente. Calle comezou o seu relatorio facendo un percorrido
polas orixes da canle-academia, “que comezou sendo un hobby e que
aínda segue sendo tal, xa que ter éxito en YouTube non dá de
comer”, unhas orixes que deron como resultado uns “vídeos moi
malos” pero que paseniño pero sen pausa foron mellorando até
converterse no que podemos ver agora en aberto, unha gran listaxe de
audiovisuais STEM para estudantes de Secundaria e Bacharelato e que
son de gran utilidade para centos de persoas cada día. A este
respecto, Calle tamén tivo cifras que achegar: Unicoos é hoxe en
día o primeiro portal educativo do ámbito español e o terceiro no
mundo, ten 700.000 subscritores en YouTube, 175.000 seareiros en
Facebook e 30.000 en Twitter. Ademais, xa foron gravados ao abeiro
desta iniciativa 700 vídeos cos recursos de seu da academia dixital.
Respecto
das razóns do seu éxito, Calle debullou unhas cantas: “En
primeiro lugar porque procuro transmitirlles paixón, enerxía e
esperanza, procuro en todo intre que as rapazas e os rapaces non se
rendan e tento facer sempre o meu traballo de xeito diferente ao
tradicional”. A este respecto, salientou o poder das pezas
audiovisuais en liña para convocar o que denominou as tres “is”
básicas de calquera reclamo formativo: imaxe, interacción (a
capacidade para ver algo a calquera hora e dende calquera lugar) e a
integración. Calle, amais do devandito, tamén tivo tempo para
animar ao profesorado galego a subirse ao caso deste tipo de
metodoloxías, convidando aos docentes a “recuperar o espírito de
mudar as cousas que tiñan cando se estrearon na profesión, e a que
lembren o intre en que tamén eran alumnos e devecían por ter diante
unha persoa e un contexto determinado que lles contaxiase a paixón
polo coñecemento”.
Con
posterioridade ao relatorio de Calle foi a quenda, nesta segunda
xornada de DICO, dunha mesa redonda sobre as pegadas que están a
deixar as contornas e recursos dixitais e eidos produtivos galegos
tradicionais. Interviñeron Norberto Penedo, director da Área de
Competitividade do IGAPE, e representantes do Clúster Alimentario de
Galicia, o Clúster Téxtil Moda e a empresa tecnolóxica Queres.
Nesta mesma (A economía tamén é dixital) os responsábeis
do Clúster Alimentario de Galicia (CLUSAGA) amosaron o seu proxecto
MarketLab, unha infraestrutura de innovación aberta, “única no
eido estatal”, centrada en analizar os factores que inflúen na
compra do consumidor actual no entorno da intelixencia competitiva.
Pola súa banda, o Clúster do Téxtil Moda (COINTEGA) presentou
SIMSS, unha plataforma que permite ás empresas do sector optimizar
os seus recursos para vender máis.