O CPETIG súmase á defensa da Enxeñaría Técnica en Informática ante o anteproxecto de Lei de Servizos Profesionais

O Colexio Profesional de Enxeñaría Técnica en Informática (CPETIG) vén de sumarse á defensa da profesión realizada pola Xunta de Goberno do Consello Xeral de Colexios Oficiais de Enxeñaría Técnica en Informática (CONCITI), organismo presidido polo galego Marcos Mata, co gallo do coñecemento das liñas mestras do Anteproxecto de Lei de Servizos Profesionais elaborado polo Ministerio de Economía e Competitividade.
No comunicado do CONCITI, ao que súmase o CPETIG, afírmase que “o CONCITI é consciente e está preocupado pola actual situación da Enxeñaría Técnica en Informática no noso país. Que a importancia que cobra cada día a Informática na nosa sociedade e a necesidade de ordenar a profesión para garantir a protección da sociedade e un crecemento económico baseado na tecnoloxía é unha máxima para nós, polo que traballaremos para que se nos recoñeza en igualdade de condicións ao resto de Enxeñeiros Técnicos, solicitando a nosa inclusión nos grupos de traballo do citado borrador de anteproxecto”.
Neste mesmo comunicado sinálase que “tendo en conta o marco que se abre con esta reforma, estase xa en contacto co resto de actores implicados, Consello Xeral de Colexios Oficiais de Enxeñaría en Informática (CCII), Conferencia de Directores e Decanos de Enxeñaría Informática (CODDII) e Reunión de Estudantes de Enxeñarías Técnicas e Superiores en Informática (RITSI) para demandar un trato xusto e ecuánime co resto de Enxeñeiros e Enxeñeiros Técnicos e por tanto un recoñecemento explícito ás profesións de Enxeñeiro Técnico en Informática e Enxeñeiro en Informática e para elo expor as accións que se crean oportunas co obxectivo de acadar os fins propostos”.