O Culturgal 2011 pechou cunha importante aposta polas TIC

A Feira das Industrias Culturais Culturgal encheu o Pazo da Cultura de Pontevedra durante a pasada fin de semana, con actividades de distintas índoles ao redor do mundo da cultura, entre as que destacaban certas actividades tecnolóxicas como a demostración do sistema de guías audiovisuais Own The Way, da ferramenta de difusión de contidos multimedia para dispositivos móbiles iBeaken e da aplicación móbil Orama e un relatorio do CIF Ferrol sobre as distintas solucións de realidade virtual que poden aplicarse para a escenografía de artes escénicas e música ou para o a promoción do turismo e o patrimonio. Pero as TIC tamén demostraron a súa transversalidade no evento, de xeito que poidamos ver puntos de información audiovisual repartidos polo recinto, pantallas táctiles para que os asistentes puideran experimentar en primeira persoal, aplicacións tecnolóxicas nos expositores presentes e unha importante aposta polo audiovisual, deixando claro que a cultura está cada vez máis viva nos novos soportes.

Juan Gómez-Jurado instou a repensar a relación entre autores, editores e público

Dentro do Foro Culturgal as TIC tamén tiveron un imporante peso, especialmente na xornada do sábado, que abriu co escritor Juan Gómez-Jurado, quen chamou á reflexión sobre os novos modelos de distribución de contidos culturais e a aproximación ao público, ao que tamén seguiu unha mesa redonda sobre as estratexias na contorna dixital, na que os proxectos de El Cosmonauta, Herzio.com e Redenasa.tv serviron de exemplo do tema a tratar.
Os profesionais que acudiron ao Foro Culturgal tamén puideron asistir a un obradoiro impartido por Roberto Carreras (consultor de comunicación, marketing e estratexia en liña) sobre a construción da presenza na Rede dos proxectos culturais.
Volvendo á distribución de contidos, durante a tarde do sábado o Foro Culturgal tamén contou cunha interesante mesa redonda conducida por Fernando Luaces (Altafonte), na que Álex Samaranch comentou o seu proxecto de distribución de comics dixitais (KOOMIC), Paula Cons detallou o proxecto Wecoop.tv e Alfonso Martínez, responsable de contidos audiovisuais de R, adiantou o servizo de vídeo baixo demanda que vai estrear o operador galego de cable nas vindeiras semanas, e que ofrecerá tanto unha serie de contidos cinematográficos á carta como un servizo de catch up tv (chamado rebobina) que permitirá retomar a emisión dun programa despois do seu comezo ou recuperar algúns dos programas emitidos durante a última semana, cun sistema áxil e doado de manexar, que facilita este acceso como se fose unha mera consulta á guía de programación en pantalla do servizo de televisión de R. Martínez tamén confirmou que dende R non desbotan a posibilidade de ofrecer contidos xerados polos usuarios na súa plataforma de vídeo.
Culminaron as mesas redondas tecnolóxicas cun repaso a 3 proxectos dixitais galegos: Contoplanet, A Engurra ao Poder e Elibro-galego. Do vídeoxogo A Engurra ao Poder non só púidose coñecer a súa historia, ver detalles do seu deseño e coñecer detalles do seu desenvolvemento, senón que incluso no expositor de EGANET na Feira podía probarse unha versión en desenvolvemento deste prometedor xogo de plataformas que prevé a súa chegada á App Store en 2012; María Arochena (Perro Verde Films) detallou as características da aplicación para iPad ContoPlanet, que busca converterse nunha completa plataforma de distribución de contidos e nos vindeiros meses dará un salto á multi-plataforma; e o director xerente de Enxenio, Roberto García Pazos, foi o encargado de adiantar algúns detalles sobre as posibilidades que permitirá Elibro-galego, plataforma de distribución de e-books que en breve presentará oficialmente a Asociación Galega de Editores, e que pretende converterse nun escaparate da edición galega, tanto na web como en dispositivos móbiles.