O INEGA quere contribuír ao aforro enerxético no fogar actualizando os seus simuladores de aforro eléctrico

Un dos simuladores do INEGA axúdanos a elixir electrodoméstico en función do seu consumo

Dada a súa utilidade e ante o desenvolvemento de novas tecnoloxías e as modificacións nos custos da enerxía, o Instituto Enerxético de Galicia (INEGA) vén de actualizar os tres simuladores que pon ao dispor dos fogares galegos, que adáptanse ás novas realidades do mercado eléctrico para facilitar ao cidadán a adopción de medidas de aforro e eficiencia enerxética nas súas vivendas, tendo en conta que o consumo enerxético do fogar representa xa un 30% do total de enerxía en Galicia, representando un custo aproximado de 2.600 euros anuais.
Para reducir estes custos, os novos simuladores ofrecerán distintas alternativas aos consumidores. Así, un fogar pode aforrar preto de 200 euros contando cunha lavadora, un lavalouzas, un frigorífico e un forno máis eficiente. Ou diminuír a factura en máis de 300 euros por exercicio evitando os consumos ocultos na televisión, o aparello de TDT ou o DVD.
En concreto, na aplicación sobre electrodomésticos, o usuario dispón agora do último etiquetado que presentan estes en función da súa eficiencia enerxética, namentres que nos consumos ocultos do fogar actualizáronse as súas variacións en función do custo da enerxía e das emisións de CO₂ por kWh consumido. Pola súa banda, o simulador de iluminación substitúe as lámpadas incandescentes de cores polos modelos máis recentes, actualiza as distincións entre tubos fluorescentes, e renova os datos de consumo, lumens e lumens/vatio para os halóxenos.
Estas ferramentas, que fan especial fincapé nos principais equipos consumidores de electricidade (electrodomésticos, iluminación e consumo oculto), facilitan o coñecemento do consumo e o custo anual de cada equipo, as posibilidades de relevo a equipos más eficientes, o aforro enerxético e económico anual, así como a amortización da inversión.