O Nest Hub con monitorización do sono chegará a España en maio

Ao presentarse a nova versión dos altofalantes con pantalla de Google, o Nest Hub, que mellora a súa calidade sonora e incorpora un sensor de movemento Soli, destacábase un programa en probas que aproveitaba este último sensor para a monitorización do sono. Dado que estas probas están previstas até o remate do ano, podiamos entender que o dispositivo podería tardar en chegar a España, pero finalmente anuncian que o Nest Hub de segunda xeración chegará a España o 4 de maio a un prezo oficial de 99,99 euros (mentres que o modelo actual custa oficialmente 89,99 euros, chegando a ofrecerse de oferta a 59 euros en diferentes ocasións).
Este dispositivo conectado con pantalla de 7 polgadas cunha resolución de 1.024 x 600 píxeles, cun altofalante cun driver de 1,7 polgadas e con 3 micrófonos de longo alcance, pode empregarse a xeito de reloxo espertador, pantalla para Chromecast, reprodutor de música e vídeo, sistema de control domótico e incluso monitor do sono, aínda que esta última funcionalidade é totalmente opcional, podendo desactivarse no caso de non querer que o trebello rexistre os movementos ao seu redor durante a noite.