O Premios EGANET serviron de escaparate da profesionalidade do sector TIC galego

Alfonso Cabaleiro e Mar Pereira non quixeron faltar á cita do sector TIC galego

Hoxe tivo lugar o acto de entrega dos premios que organiza por oitava vez a Asociación de Empresas Galegas Adicadas á Internet e ás Novas Tecnoloxías (EGANET) no Palacio de Congresos e Exposicións de Galicia, cerimonia á que se achegaron uns 200 profesionais do sector tecnolóxico galego, así como representantes da Administración entre as que podemos destacar a Mar Pereira, secretaria xeral de Modernización e Innovación Tecnolóxica, e a Alfonso Cabaleiro, secretario xeral de Medios, que presidiron a entrega de premios.
A estes premios concorreron 74 empresas, entidades e profesionais cun total de 192 candidaturas, aínda que na cerimonia de entrega dos premios limitouse a presenza aos finalistas das distintas categorías, todas de grande interese pola súa proxección empresarial e a súa innovación, servindo de exemplo do bo traballo que está a realizarse dende o sector na nosa comunidade. Tamén cómpre destacar o labor do xurado, que tivo que avaliar numerosas candidaturas e demostrou unha vez máis o seu bo facer pola imparcialidade e calidade que caracterizan a estes galardóns.

Tradicional fotografía de familia dos galardoados na VIII edición dos Premios EGANET

A primeira categoría en recibir premio foi a de Comunicación Dixital, que recolle as mellores iniciativas relacionadas coa publicidade en liña, os medios sociais e outras ferramentas comunicativas nacidas na Rede, resultando gañadora a campaña Mátalos de risa con Kill Paff, da viguesa Elogia, aínda que o resto de traballos que optaban ao galardón tamén eran bastante representativos da excelencia que está a acadar o sector: o proxecto de Galinus Taller de Novos Medios para levar as exposicións dos Museos Científicos Coruñeses ao eido dixital (coas páxinas web Misterdarwin.eu e eMuseo), a Memoria anual 2010 da Cruz Vermella Española en Galicia elaborada por Neo Comunicación e a campaña de promoción Redescubre a Cidade Vella de Turismo de Ourense.
A Mellor Aplicación de software elixida polo xurados dos premios foi BayDICOM Media de Bahía Software, ferramenta que permite a importación e exportación de imaxe médica dixital en soportes físicos, que actualmente empregan o Instituto Catalán da Saúde, o Hospital Santa María de Lleida ou a Fundación Hospital Asil de Granollers (e que recibiu outro importante recoñecemento este mesmo mes). Tamén se recoñeceu a calidade do resto de finalistas nesta categoría: a aplicación web para a planificación, monitorización e control de proxectos LibrePlan de Igalia (anteriormente coñecida como NavalPlan), o proxecto de innovación social de InfoJC Un Mundo Accesible e a ferramenta de cálculo de illamentos acústicos SONarchitect ISO de Sound of Numbers.
Moi rifada estivo a categoría de Proxecto de Negocio Online, na que resultou gañadora a iniciativa de Elo Technologies coñecida como BuyDeal (considerada como a Groupon galega), pero sen chegar a ensombrecer proxectos tan ambiciosos como a plataforma de crowdsourcing para producións audiovisuais Wecoop emprendida por Continental Producciones, a plataforma web de contidos dixitais Meubook ou a páxina web Menus.es, das que demos conta nos últimos meses, e que todas esperaron bastante interese social.

O evento serviu para recoñecer o labor das empresas asociadas a EGANET que levan 10 ou máis anos en activo

Ao premio para o Proxecto Emprendedor TIC optaron a empresas de solicitude de orzamentos de construción Enkenda, o estudo de desenvolvemento de videoxogos Moonbite Games, a empresa luguesa detrás de Menús.es e a compañía coruñesa Trileuco Solutions, responsable da plataforma de e-learning de idiomas a través de videoconferencia LetsLearnTV, que valeulles finalmente o recoñecemento nesta categoría.
O último dos premios a concurso correspondía ao Proxecto Empresarial TIC, ao que optaron Elogia, a Factoría de Software e Multimedia (nacida de Imaxín Software), La Nautica Servicios Nauticos e Visual Publinet, recaendo o recoñecemento en Elogia, que sería a única empresa en recibir dous premios nesta edición.
Para fuxir do lado máis empresarial desta gala, fíxose entrega dun Premio Especial EGANET, para recoñecer o labor da Fundación Foltra, entidade privada sen ánimo de lucro que presta axuda á rehabilitación física e intelectual de pacientes con danos neurolóxicos ou con calquera outro tipo de patoloxía que este ano fixo unha aposta decidida polo uso da TIC incorporando á súa estrutura un Centro Virtual, unha Aula Virtual e unha intranet/extranet, que contribúen á vertebración da prestación de servizos que ofrecen, tanto ás familias coma aos centros colaboradores.

Víctor López, presidente de EGANET, reivindicou no seu discurso de clausura a importancia das TIC para as nosas sociedade e economía

Para rematar o evento, EGANET fixo entrega dun recoñecemento ás empresas asociadas con 10 ou máis anos en activo, no que podiamos considerar como a celebración da iniciativa empresarial galega e a súa consolidación, o que serviu para destacar este ano a Abertal Networks, Ceo Aberto, Elogia, Igalia, Infonet, Infoweb Galicia, Iterdata Networks, MIP Configuraciones Informáticas e Teaxul. A este emotivo recoñecemento seguiron as palabras do presidente de EGANET, Víctor López, quen tivo a ben salientar o papel fundamental que as empresas do sector teñen que asumir para ser motores da sociedade e da economía galegas, destacando o valor das TIC para mellorar “a produtividade, a competitividade, racionalizar os resursos e reducir os custos”, factores chave para o éxito.
A gala presentada por Susana Alvite (Hexis Comunicación) e o que subscribe, Marcus Fernández (Código Cero), contou co financiamento da Secretaría Xeral de Modernización e Innovación Tecnolóxica e os fondos FEDER, que fixeron posible o correcto desenvolvemento dun acto que pon o broche a un ano no que o sector TIC galego demostrou estar máis vivo que nunca.