O prazo para optar ao premio fin de carreira e mestrado do CPEIG ficará aberto até o 10 de maio
mércores, 13 de marzo do 2019
O
Premio Fin de
Carreira e Máster en Enxeñaría Informática, convocado os días
pasados polo Colexio Profesional de Enxeñaría en Informática de
Galicia, vai ter aberto o prazo de presentación de candidaturas até
o vindeiro 10 de maio, a través do enderezo electrónico
informacion@cpeig.gal e
enviando toda a documentación precisa (ficha resumo do proxecto,
resumo e memoria completa do mesmo).
O
galardón, que ten unha dotación económica de 1.000 euros, chega
este ano á súa décima edición. A información sobre as bases
xa está habilitada na web do colexio, en formato PDF, ao igual
que o
formulario para presentar candidatura.
O
obxectivo, segundo informa o colexio, é ser un estímulo para quen
estea a cursar estudos de Enxeñaría en Informática ou para quen
veña de obter o título ou o mestrado no mesmo eido do coñecemento.
O galardón entregarase no marco da Noite da Enxeñaría en
Informática de Galicia, que se celebrará o 28 de xuño en Santiago
de Compostela.
Terán
opción de concorrer ao premio enxeñeiras e enxeñeiros que
presentasen nunha universidade galega o proxecto fin de carreira da
Enxeñaría en Informática ou o traballo fin de Máster en Enxeñaría
Informática nos anos 2017, 2018 e 2019.
Mediante
a organización deste premio, o ente colexial busca “achegarse ao
colectivo estudantil e defender as vantaxes da colexiación, ademais
de estimular o traballo dos estudantes”.
A
Noite
A
convocatoria realizada polo CPEIG insírese nos premios da Noite da
Enxeñaría en Informática de Galicia, que o Colexio organizará o
28 de xuño, en Santiago de Compostela. Este evento anual, ademais de
representar un punto de encontro entre todos os colexiados, conta
cunha destacada participación de cargos empresariais, institucionais
e políticos e é un referente para o sector.