O programa 21 Días co galego esténdese a máis centros e faise firme na Rede
martes, 14 de xaneiro do 2020
Suma
e segue o proxecto 21 Días co galego,
impulsado dende o IES da Pobra do Caramiñal (da man da profesora
Pilar Ponte Patiño, recentemente
galardoada polo seu labor co Premio da Cultura Galega que concede o
Goberno autonómico). Este luns 13 presentouse
a súa nova andaina no IES Arcebispo Xelmírez I de Santiago, nun
acto onde se fixo saber que a iniciativa chegará este ano a 4.000
estudantes de Secundaria de toda Galicia, fronte aos 1.316 do curso
anterior.
A
nova etapa estendida de 21 Días co galego (21 Días co
galego e +) foi presentada polo secretario xeral de Política
Lingüística e o director xeral de Educación, que puxeron o foco no
crecemento da experiencia (que pasa de abranguer catro de ensinos a
ter presenza en dez) e no carácter referencial do seu sitio en liña,
https://blogs.xunta.gal/21diascogalegoemais/.
Segundo
fixeron saber, neste programa trátase de facer o mesmo que fixo o
IES da Pobra en orixe, unha iniciativa de éxito en materia de
dinamización do galego entre a xuventude, pero extrapolándoo a toda
a nosa xeografía. O obxectivo final, dixeron, é que a xente nova
fale máis galego dentro e fóra das aulas (trátase de convidar á
rapaza a mergullarse na lingua durante 21 días, precisamente).
A
nova edición vaise desenvolver durante os 21 días comprendidos
entre o 13 de xaneiro e o 2 de febreiro.
Segundo
fixo saber o secretario xeral sobre a nova convocatoria e as
novidades que pon en xogo, “este ano propuxémonos unha maior
participación das familias, así como do profesorado de
departamentos diferentes aos de Lingua Galega e Literatura, en
especial neste Instituto Xelmírez I, onde, de xeito experimental,
cada semana serán os docentes dunha materia distinta os que
canalicen os retos do 21 días”.
Pola
súa banda, o director xeral de Educación, Formación Profesional e
Innovación Educativa, Manuel Corredoira, destacou a importancia “de
que a comunidade educativa se implique na implementación de
proxectos innovadores que favorecen a dinamización do galego a
través de propostas atractivas e orixinais para o alumnado que
inciden desde os ámbitos escolar ou familiar na promoción do uso
social do noso idioma”.
Canda
os responsábeis da Xunta, participaron na presentación o presidente
da Real Academia Galega, Víctor F. Freixanes; o director do IES,
Manuel Portas; a promotora e coordinadora do programa, Pilar Ponte, e
alumna de bacharelato Noela Rivas.
504
horas na nosa lingua
21
Días co galego e + é un programa promovido pola Xunta de
Galicia baseado no número de xornadas que se consideran precisas na
adquisición dun hábito, unha experiencia que se desenvolveu
primeiramente no IES da Pobra do Caramiñal, da man da profesora
Pilar Ponte e que, desde o curso pasado, o Goberno galego asumiu como
propia para facela extensiva a outros catro centros, un por
provincia. Participaron na primeira edición un total de 95 docentes
e de 1.316 alumnas e alumnos de 12 a 18 anos.
En
2020, o programa continúa a súa expansión coa participación de 10
centros e 3.877 alumnos e alumnas dos 12 aos 18 anos da ESO, de
Bacharelato e de FP, que se comprometen a falar soamente en galego as
24 horas do día durante as 21 xornadas que dura o programa, é
dicir, un total de 504 horas ininterrompidas na nosa lingua desde o
13 de xaneiro ao 2 de febreiro de 2020, dentro e fóra do centro. Así
mesmo, tamén participan de forma directa 305 profesoras e profesores
e 60 membros do persoal de administración e servizos.
Os
centros participantes son o IES As Lagoas (Ourense), IES Afonso X O
Sabio (Cambre), IES Antón Alonso Ríos (Tomiño), IES Ánxel Fole
(Lugo), IES Arcebispo Xelmírez I (Santiago de Compostela), IES
Eduardo Blanco Amor (Ourense), CPR Plurilingüe Fogar de Santa
Margarida (A Coruña), IES Illa de Ons (Bueu), IES de Poio e IES de
Vilalonga (Sanxenxo).
Toda
a actividade na Internet
O
soporte central da iniciativa é o blog 21
Días co galego e +, onde se mostrarán as creacións dos
centros adheridos, que deberán seguir e actualizar cada día os
participantes para recibir diferentes contidos: unha vez á semana
aparecerá o reto de grupo que deberá superar o alumnado.
En
palabras das entidades impulsoras, o programa 21 Días co galego e
+ está centrado no “fomento da lingua oral mediante a
asociación do galego coa modernidade, coas novas Tecnoloxías da
Información e a Comunicación e coas redes sociais”. Ademais,
explican, “emprega unha metodoloxía baseada na aprendizaxe por
proxectos e no traballo cooperativo”, e pon en xogo elementos de
gamificación (extrapolación á vida real de metodoloxías
eficaces propias dos videoxogos) que poden ir desde os xogos máis
tradicionais a experiencias innovadoras, entre elas tarefas
colectivas como os retos.
O
galardón a Pilar Ponte Patiño
Na
categoría de Lingua, Pilar Ponte Patiño, profesora do IES da Pobra
do Caramiñal de Lingua e Literatura Galegas, recibiu en 2019 o
Premio da Cultura Galega. No ano 2012, a profesora creou no centro
docente onde imparte clases o proxecto 21 Días co
galego, co que anima as mozas e mozos do instituto a se expresar
na nosa lingua durante tres semanas, todo o día e con todo o mundo,
actuando así a prol do idioma nun tramo de idade vital para o futuro
da lingua e no que o proceso de substitución lingüística polo
castelán se acelerou de maneira notábel nos últimos anos.
Pilar
Ponte creou a iniciativa co obxectivo de que o alumnado da Pobra do
Caramiñal acadase “unha maior competencia na lingua do país e
unha mellor conciencia lingüística a través de actividades
variadas, sempre concibidas para levar o idioma sobre todo a aqueles
eidos onde nunca estivera na vida dunha parte importante dos e das
adolescentes”. Desde 2014 é un proxecto de centro que implica a
todo o alumnado de ESO e Bacharelato. No ano 2015 recibiu o Premio á
innovación educativa en normalización lingüística.