O proxecto MarumaSat III e os nosos institutos estudarán o ocaso diúrno da lúa

Hoxe temos unha cita coa investigación aeroespacial no IES Maruxa Mallo de Ordes. Unha cita, ademais, que conta co engadido de ser unha proba real de iniciación nas tecnoloxías ligadas ás telecomunicacións e aos voos non tripulados. A experiencia, que vén da man da Axencia Espacial Escolar Galega (NOSA), desenvolverase a partir das 16.00 e horas e consistirá nunha proba dupla: por unha banda a solta dun globo de helio MarumaSat III, dende as instalacións do dito IES de Ordes, e pola outra no lanzamento dun dron que achegará cobertura á iniciativa e proporcionará imaxes aéreas externas do globo e máis da cápsula integrada no mesmo.
Na cita participan o IES Marco do Camballón de Vila de Cruces e o IES Miraflores de Oleiros, todos eles compoñentes de NOSA. Tamén foi convidado o IES Xelmírez II de Santiago, que porá a proba a operatividade das novas aplicacións para a obtención de datos científicos que sirvan á mellora de futuras viaxes.
Segundo engade a axencia, a solta do globo de helio ten a autorización da entidade AENA para que o vindeiro luns 7 de maio, ás 12.00 do mediodía, poida levar a cabo a misión Niño no faro (tratando de obter imaxes estratosféricas a máis de 35.000 metros de altura do fenómeno do ocaso da lúa diúrna). NOSA tamén informa que o novo deseño da cápsula “tratará de facela visible dende outros satélites, reflectindo a xeito de espello a luz solar dende a súa cuberta superior”.
Por certo que AENA concedeu tamén o seu permiso para unha segunda data de lanzamento en previsión de que as condicións atmosféricas do día 7 de maio impidan a recuperación da cápsula. Será o martes 29 de maio á mesma hora e desde idéntico lugar: ás 12 da mañá no IES Maruxa Mallo, nas Casillas, Ordes. Para máis información da experiencia, está habilitada na web da Consellería de Educación un PDF con todos os datos da mesma.