O xogo galego para smartphones, Fly Away, recoñecido no Programa Yuzz

mércores, 9 de setembro do 2015 Redacción

JPEG - 71.6 KB
Presentación de Cogomelo Games en Galicia Open Future

O proxecto galego Fly Away, unha iniciativa para crear un xogo para smartphones centrado no usuario, vén de resultar gañador do certame de emprendemento do Programa Yuzz. O recoñecemento concedido a Fly Away, proxecto impulsado por Abrahan Dopazo e Alfonso Varela, consiste nunha viaxe ao epicentro da industria TIC mundial, Silicon Valley (Estados Unidos). Segundo informa a Universidade da Coruña, unha das sedes de Yuzz (iniciativa na que colabora arreo), ás portas habilitadas pola UDC no certame petaron máis de oitenta mozos e mozas cun total de cincuenta proxectos empresariais.
Yuzz ten como obxectivo promover o emprendemento no contorno tecnolóxico de persoas menores de trinta anos. Vén da man do Banco Santander, a través de Santander Universidades, e conta coa colaboración da Rede Emprendia e a Xunta de Galicia.
O proxecto seleccionado, Fly Away, é como dixemos un xogo para smartphones centrado no usuario que desenvolven Dopazo e Varela dentro do seu estudio Cogomelo Games xunto co deseñador Diego Cambre. Abrahan Dopazo, xunto con outras 42 novas promesas da contorna tecnolóxica de España, visitará Silicon Valley para coñecer de preto o que a organización do concurso cualifica do “maior ecosistema de emprendemento e innovación do mundo”. Acudirán tamén á sede de compañías de “grande relevancia internacional” como Google, LinkedIN, Facebook ou Hewlett Packard e asistirán a conferencias en universidades referencias como Berkeley ou Standford.
Ademais poderán coñecer o Spain Tech Center –impulsado por Banco Santander, ICEX e Red.es- que ten como meta facilitar a implantación de PEME de alicerce tecnolóxico español neste lugar.
O 6 de novembro, en Cidade Grupo Santander, os 42 mozos e mozas seleccionados presentarán as súas ideas perante un xurado integrado por representantes de Banco Santander, CISE e entidades colaboradoras do Yuzz. Os tres mellores emprendedores recibirán unha dotación económica (30.000, 20.000 e 10.000 euros) para que poidan acelerar os seus proxectos.

PUBLICIDADE