Once medios dixitais galegos xa contan co selo NRede do CPXG

O proxecto NRede, Rexistro de Medios Dixitais Galegos posto en marcha en febreiro polo Colexio Profesional de Xornalistas de Galicia (CPXG) para pór en valor os medios dixitais galegos, comeza a identificar os espazos con contidos xornalísticos a través do selo de seu (o selo NRede). Así, once cabeceiras galegas xa contan arestora coa certificación que garante que a súa información “é froito dun traballo profesional”, segundo acredita do selo. Os medios interesados en ser incluídos no rexistro poden solicitar a súa inscrición a través da páxina web do Colexio.
NRede, como lembraremos, ten o obxectivo e garantir e reivindicar o traballo xornalístico, facilitar a identificación dos medios dixitais galegos ante a sociedade e, ao tempo, facilitar a súa acreditación ou acceso a axudas públicas.
Nas últimas semanas, o rexistro recibiu as primeiras solicitudes e emitiu os selos que identifican xa a once cabeceiras como medios de comunicación con criterios xornalísticos no eido dixital.
Os primeiros once medios incluídos no rexistro dos medios dixitais galegos son Galicia Confidencial, Galiciapress, GCDiario, Lugo Xornal, Mundiario, Pontevedra Viva, Praza Pública, Tempos Dixital Xornal da Mariña, Xornal de Lemos e Xornal de Vigo. Todos eles, salienta o CPXG, “cumpren cos requisitos que garanten que son espazos de comunicación con contidos xornalísticos, con información froito dun traballo profesional e que respecta a deontoloxía do xornalismo”. Ademais, dan boa conta da pluralidade do xornalismo dixital galego, ao representaren distintos enfoques comunicativos e cubriren boa parte da xeografía da nosa comunidade.