Optare e Telefónica xuntan forzas para mellorar as experiencias e aplicacións do 5G

Optare Solutions, firma TIC da nosa terra, vén de xuntar forzas coa operadora Telefónica para desenvolver unha solución con capacidade para garantir a máxima calidade das redes 5G e, en consecuencia, as mellores experiencias dos usuarios e un abano máis amplo de posibles aplicacións. En termos máis concretos, Optare e Telefónica darán forma á ferramenta Intelligent QoE Analytics.
O cometido da mesma será avaliar o nivel de excelencia dos servizos despregados sobre unha plataforma Open Source Man (OSM) e, deste xeito, “realizar accións correctivas e preventivas que permitan lograr o meirande beneficio das novas aplicacións e solucións que se ofrecerán sobre 5G”.
A iniciativa conxunta ten a súa orixe nunha preocupación compartida: ambas empresas desexan un panorama de máxima rendibilidade para o novo estándar móbil, que garanta os mellores casos de uso nos eidos empresariais, científicos, sanitarios e de xestión pública. Este panorama virá marcado polas necesidades específicas de cada ámbito: “Teremos redes con necesidades de ultra-baixa latencia e ultra-alta dispoñibilidade como as do coche autónomo ou a cirurxía remota, outras con gran demanda de dispositivos conectados como Industria 4.0, e outras con alta capacidade no ancho de banda, como os servizos de entretemento en mobilidade e realidade virtual”, explican as dúas empresas, engadindo que o éxito en cada un destes casos dependerá de que se garanta a calidade de experiencia (QoE) no uso do servizo entregado aos usuarios finais.
Os recursos de Optare
Optare dispón na actualidade da solución QoE Optimization, que permite medir e optimizar a QoE percibida polos usuarios no uso dos servizos prestados polo operador. Agora, coa evolución a Intelligent QoE Analytics, potenciarase o uso óptimo do network slicing a través das métricas de QoE obtidas en dispositivos dos usuarios e a integración cos elementos e recursos da plataforma OSM para realizar as actuacións preventivas e correctivas necesarias. Ademais desenvolverase o módulo Cognitive QoE Analytics para poder incorporar na plataforma, de xeito áxil, métricas de QoE de novos servizos non consolidados, para os que aínda non hai unha regra formal de como medila.
Xosé Ramón Sousa, de Optare, sinala que “a nosa empresa continúa demostrando o seu liderado na medida de QoE no ámbito de telecomunicacións. Grazas a esta alianza con Telefónica, poderemos ampliar agora a nosa experiencia ao contexto 5G, onde Optare leva anos participando en proxectos de I+D europeos como Sonata, 5GTango ou Veo5G”.
Nuria Higuera, da Xerencia de Innovación de Telefónica explica que “a Telefónica preocúpalle ter as máximas garantías para proporcionar o mellor servizo aos seus clientes e cubrir as súas expectativas. Este proxecto permitiranos avanzar nesta dirección para seguir garantindo esta calidade cos novos servizos que aparecerán coa chegada de 5G”.