Os discos de vinilo superan en unidades vendidas aos CD

Relación entre millóns de dólares en ingresos e anos da música en formato físico

A industria discográfica estadounidense vén de facer un balance do ano 2022, reflectindo un incremento en ingresos por sétimo ano consecutivo (o que pode contrastar coa impresión que transcende dos artistas), destacándose un detalle bastante curioso no informe: por primeira vez dende 1987 os discos de vinilo (con 41 millóns de unidades) terían superado en vendas aos CD (con 33 millóns de unidades). Cómpre salientar que se analizamos os ingresos por formato, o sorpasso do vinilo teríase producido en 2020, cando os álbums en CD facturaron 483,2 millóns de euros, mentres que os vinilos terían xerado 643,9 millóns de euros.
Aínda que os discos de vinilo estean a medrar en vendas dende 2008, cómpre salientar que estamos ante un fenómeno máis ligado ao coleccionismo que ao consumo musical, xa que os soportes físicos en 2022 só xeraron o 11% dos ingresos da industria, mentres que o streaming domina xa o 84% da facturación. Como exemplo do anecdótica que era a venda de vinilos podemos comentar que en 2007 xerou 48 veces máis cartos a venda de tons para móbiles, o que tamén é unha boa mostra do moito que mudou o sector en poucos anos.
Pola súa banda, os CD carecen do atractivo nostálxico do vinilo como obxecto físico, e na actualidade resulta moi complicado atopar reprodutores deste formato (nin os ordenadores persoais inclúen dende hai anos unidade óptica), de aí que non sexa unha sorpresa que as súas vendas estean en caída libre.
No que respecta ao streaming, o sector musical goza de boa saúde, cun incremento do 8% da facturación das subscricións en 2022, superando os 10.000 millóns de dólares e copando o 77% dos ingresos do streaming. A publicidade (moi presente na versión de balde de Spotify e en servizos como YouTube)tamén supón importantes ingresos para o sector, aínda que só medraron un 6% até chegar aos 1.800 millóns de dólares.
Ao igual que acontece cos CD, as descargas dixitais non paran de caer, o no último ano descenderon un 20% ata quedar en 495 millóns de dólares, polo que só supoñen o 3% dos ingresos do sector, cando en 2012 chegaron a ocupar o 43% do mercado, o que leva a pensar que estamos ante un modelo de negocio que podería desaparecer completamente en breve (ou, cando menos, quedar sen ningunha grande plataforma que o ampare).