Os novos obradoiros de SmartPEME poñen o foco na ciberseguridade, na transformación TIC ou no uso de podcasts

A Deputación de Pontevedra, a través de SmartPEME, oferta seis novas formacións para esta semana, enmarcados na súa carteira de obradoiros tecnolóxicos para persoas autónomas, pequenas e medianas empresas e cidadanía en xeral. As accións tratarán a ciberseguridade en dispositivos móbiles, a reorientación de negocios tradicionais e familiares estancados, o uso de podcasts, a promoción de alugueiros vacacionais, as tendencias de economía dixital ou a promoción de negocios co perfil de empresa de Google.
Os obradoiros darán comezo este luns 13 pola mañá co curso sobre Ciberseguridade e dispositivos móbiles, para ver a importancia de protexer os dispositivos móbiles que xa están a desprazar aos PC na xestión cotiá dos negocios. Este obradoiro será impartido por Manuel Freire, experto universitario en Robótica, Programación e Impresión 3D.
O martes impartirase unha nova formación guiada pola consultora e adestradora empresarial, Isabel Rodríguez. Dirixirá Reorientación de negocios tradicionais e familiares que se atopen estancados un obradoiro que ensinará a reorientación de negocios e, tendo en conta a demanda do mercado, evitar o peche dos negocios familiares.
O mércores 15 haberá dúas accións formativas; pola mañá a graduada en Publicidade e Relacións Públicas, Laura Carrera, impartirá o curso Audio márketing: crea e diferénciate da competencia cos podcast, que ensinará como o uso dos arquivos sonoros pode facer que un negocio destaque sobre a competencia. Na quenda de tarde, Sonia Torres, técnica de empresas e actividades turísticas, ofrecerá Promociona o teu alugueiro vacacional en Booking, unha formación orientada a persoas emprendedoras, autónomas e a empresas do sector turístico no que se ensinará a crear e optimizar anuncios de aloxamentos e condicións e vantaxes da plataforma Booking.
O xoves 16 de febreiro, rematará a semana lectiva con outras dúas formacións. Na mañá, no punto SmartPEME de Cambados, de novo Manuel Freire impartirá o curso Tendencias de economía Dixital 2023. O obxectivo deste obradoiro é o de dar a coñecer as principais tendencias tecnolóxicas para o 2023, cun repaso ás tecnoloxías emerxentes e a evolución de outras xa existentes. Pola tarde, o licenciado en comunicación audiovisual, Adrián Fernández, impartirá o curso Promociona o teu negocio co perfil de empresa de Google. A finalidade deste obradoiro é dar a coñecer a ferramenta de Google, enfocada a negocios locais que busquen unha maior visibilidade. O perfil de empresa de Google está pensado para facilitar o aproveitamento, por parte dos pequenos comercios.