Pecha Megaupload.com baixo acusacións de piratería

Unha das principais páxinas web de intercambio de ficheiros, Megaupload, vén de ser clausurada baixo acusación de piratería, acusándoselle de ter causado uns prexuízos económicos de máis de 500 millóns de dólares por mor do intercambio de películas e outros contidos. O Departamento de Xustiza dos EE.UU. asegura que a operación de peche incluíu a detención de Kim Dotcom (antes coñecido coma Kim Schmitz) e outras 3 persoas en Nova Celandia a petición das autoridades norteamericanas.
Dende Megaupload aseguran que a meirande parte do tráfico do seu servizo é lexítimo, e intentarán seguir en activo (de feito, respondían dilixentemente ás peticións de borrado de material protexido), mentres que dende as industriais culturais acusan a esta plataforma de facilitar de xeito masivo as infraccións dos dereitos de propiedade intelectual.
Megaupload funcionaba mediante un modelo de negocio mixto, de xeito que os usuarios de pagamento podían acceder a un servizo de descargas máis rápido e avanzado, á vez que explotaba publicidade para tirar proveito dos usuarios que non pasaban por caixa.
Esta causa xudicial tamén está a resultar un tanto rechamante polo feito de que unha corte do Distrito de Virxinia (EE.UU.) estea a reclamar a xurisdición por estar parte dos materiais piratados en servidores en Ashburn (Virxinia), mentres que o principal acusado, o fundador de Megaupload, residía entre Hong Kong e Nova Celandia e ten dobre cidadanía finlandesa e alemá. Un auténtico enredo internacional que haberá que ver como remata.

ACTUALIZACIÓN: Esta operación orquestrada por un grande xurado de Virxinia a través dunha causa contra as corporacións Megaupload Limited e Vestor Limited, ás que acusan de conspiración para infrinxir o copyright, branquear cartos e outros cargos, supón o bloqueo de 18 nomes de dominio (megastuff.co, megaworld.com, megaclicks.co, megastuff.info, megaclicks.org, megaworld.mobi, megastuff.org, megaclick.us, mageclick.com, hdmegaporn.com, megavkdeo.com, megaupload.com, megaupload.org, megarotic.com, megaclick.com, megavideo.com, megavideoclips.com e megaporn.com) e o peche de data centers en Holanda, Canadá e Washington.
Aparte de Kim Dotcom, hai outros 6 acusados, residentes en distintos países (Alemaña, Eslovaquia, Turquía, Estonia e Holanda), resultado detidos en Auckland (Nova Celandia) Dotcom, Finn Batato, Mathias Ortmann e Bram van der Kolk, quen poderían ter que enfrontarse a peticións de condena de ata 20 anos de cadea por crime organizado, 5 anos por conspiración para vulnerar o copyright, 20 anos por branqueo de cartos e 5 anos por varios cargos criminais de infracción de copyright. Tamén comentan que incautaron bens por valor de 50 millóns de dólares, entre os que figura a colección de coches de Kim Dotcom.

ACTUALIZACIÓN (20-1-2012): A incautación dos coches do fundador de Megaupload pode verse nunha galería fotográfica que veñen de publicar en Flickr. Resulta curioso ver as matrículas dos vehículos (CEO, HACKER, MAFIA, POLICE...).