Presentado en Santiago un catálogo de recursos matemático-informáticos para mellorar o día a día das empresas
luns, 16 de abril do 2012
A Rede Española
Matemática-Industria (math-in) que
preside a profesora da Universidade de Santiago Peregrina Quintela presentou a
semana pasada en Compostela unha recurso de gran utilidade para as empresas. Trátase
dun catálogo que compendia os servizos que os grupos de investigación
matemática e computacional españois poñen hoxe en día a disposición do noso tecido
produtivo, para este caso concreto da devandita Rede un grupo integrado por máis
de 400 clientes dos sectores máis variados. A Rede Matemática-Industria, pola súa
parte, está formada por 29 grupos de investigación de 18 universidades
estatais, 5 deles da Universidade de Santiago, dous da da Coruña e tres da de
Vigo. O seu cometido é favorecer a transferencia tecnolóxica, neste caso de
base matemática e computacional, dende os campus cara ao día da día das iniciativas
de mercado.
Os datos foron presentados por Peregrina
Quintela, polo director xeral de I+D, Ricardo Capilla, e por un nutrido grupo
de representantes das nosas tres institucións educativas superiores.
O recurso achegado fíxose público baixo o
seguinte título: Solucións matemáticas para
empresas innovadoras. Catálogo de servizos ofertados. A publicación,
informaron os responsábeis da mesma, “identifica a oferta investigadora por sector, dá a coñecer a demanda empresarial de técnicas matemáticas e dispón dunha guía de axuda sobre a capacidade destas tecnoloxías para resolver problemas innovadores na industria”.
Acompañando a presentación do catálogo, déronse
a coñecer diversos casos de éxito de aplicación de metodoloxías e técnicas
matemáticas e computacionais no seo dunha empresa. Por exemplo, as experiencias
de Ferroatlántica I+D (que se beneficiou do traballo do grupo de investigación en Enxeñaría Matemática da USC, que puxo en marcha unha ferramenta
informática que permite mellorar o deseño e funcionamento dos fornos de indución),
Inditex (que contactou co grupo Modes da UDC para solicitar un método de
predición de sinistros que fixese máis doada a xestión no eido da política
aseguradora da compañía galega), ou o SERGAS (que a través da unidade de
bioestatísica grupo Modestya da USC puido tirar partido do software libre
EPIDAT, de gran potencial para a análise e tratamento de grandes cantidades de
información para predicir e controlar factores de saúde diversos e incidencia
de determinadas doenzas).